ئیحسان حه‌سه‌ن: من شیانێن هه‌نه به‌رنامه‌كێ دی جودا ژیێ وه‌رزشی پێشكێش بكه‌م
دهۆك، هه‌رهین محه‌مه‌د:
ئیحسان حه‌سه‌ن، میدیاكار و پێشیكێشكارێ به‌رنامێن وه‌رزشی، د دیداره‌كێ دا بۆ رۆژناما ئه‌ڤرۆ دیاركر كو ل ده‌ستپێكا سالا 1992 وی ل گه‌ل میدیاكار جه‌میل خه‌لیل ل رادیۆیا دهۆك به‌رنامێ رۆژانه به‌لاڤوكا وه‌رزشی و دیسان به‌رنامێ خه‌باتا قوتابیان هه‌بوون و ل سالا 1994 هه‌تا سالا 1998 وه‌كو ده‌سته‌یا نڤیسینێ ل گوڤارا گازی و به‌رپرسێ لاپه‌رێ وه‌رزشی كاركریه، ل سالا 1997 هه‌تا سالا 2012 ل دهۆك تیڤی وه‌كو به‌رپرسێ پشكا وه‌رزشی كاركریه، هه‌روه‌سا ل سالا 1998 هه‌تا سالا 2009 به‌رپرسێ لاپه‌رێ وه‌زشی یێ رۆژناما په‌یمان بوویه و ل سالا 2010 ل رۆژناما وار وه‌كو سه‌رپه‌رشت كاركریه و ل سالا 2013 هه‌تا سالا 2020 ل كه‌نالێ وار سپۆرت و كه‌نالێ وار تیڤی یێ گشتی وه‌كو رێڤه‌به‌رێ پشكا كوردی و رێڤه‌به‌رێ پشكا به‌رنامان و پشكا وه‌رزشی كریه و ژبلی ئه‌ندامه‌تیا ده‌سته‌یا نڤیسینێ ل رۆژناما وه‌رزش و ئاژانسا ئه‌كا نیۆز و رۆژناما ته‌ئاخی ب هه‌ردو زمانان و رۆژناما خه‌بات، هه‌روه‌سا وه‌ك په‌یامنێر ل كوردستان تیڤی ژی كاركریه و هه‌تا نوكه په‌شێمانی چو كارێن خوه نینه.
ناڤهاتی گۆت: من ژیێ خوه و گه‌نجاتیا خوه دا راگه‌هاندنێ و راگه‌هاندنێ ژی ڤیانا خه‌لكی و ناڤ و ده‌نگی و شاره‌زایی یا ئاخفتنێ و كه‌سایه‌تیه‌كا دی یا نوو دا من و ل ده‌ستپێكا من ئه‌ز وه‌رزشڤان بووم ل ده‌ستپێكێ ل قوتابخانا و بنگه‌هێن لاوان و یانێن وه‌رزشی و دیسان خودان باوه‌رناما وه‌رزشی بووم و من ڤیا وه‌كو بسپۆری د ڤی واری دا كاربكه‌م و ره‌نگه هنده‌ك جاران من ڤیایه دواره‌كێ دی دا رۆلێ خوه بینم، به‌لێ وه‌رزش و رۆژنامه‌ڤانی و میدیایا وه‌رزشی ما دووڤ من ڤه، له‌ورا من به‌رده‌وامی دایێ و هه‌موو كه‌س نه‌شێن به‌رامبه‌ری چاڤكێن كامیرێ ب راوه‌ستن و به‌رنامان ئێكسه‌ر پێشكێش بكه‌ن و پتری بیست سالان ئه‌ڤ سه‌ربۆر ل سه‌ر شاشێن تیڤیان هه‌نه و من شیانێن هه‌نه به‌رنامه‌كێ دی جودا ژ به‌رنامێن وه‌رزشی پێشكێش بكه‌م، به‌لێ من هزر دهندێ دا نه‌كریه و ده‌مێ رۆژنامه‌ڤانی دا من دیدارێن سیاسی و هونه‌ری ژی ئه‌نجام داینه.
