یێ ل باشترین ده‌نگێ كچه‌كا ده‌ڤه‌را به‌هدینان دگه‌ڕیێت
دهۆك، كاوین جیهاد ته‌حلاڤی:
ئاوازدانه‌رێ به‌رنیاس (هه‌لكه‌وت زاهر) د دیداره‌كێ دا بۆ رۆژناما ئه‌ڤرۆ دیاركر كو به‌رده‌وام ئه‌و یێ بزاڤێ دكه‌ت كه‌سێن ده‌نگ خۆش و باش ل هه‌موو باژێران دیار بكه‌ت، ژوانا ده‌نگێ باشترین كچ ل ده‌ڤه‌را به‌هدینان، هه‌روه‌سا كۆڕ ژی.
هه‌لكه‌وتی گۆت: ل ده‌ڤه‌را به‌هدینان سترانبێژ و ده‌نگخۆش لێ دمشه‌نه، لێ هونه‌رمه‌ند عه‌بدولقه‌هار زاخۆیێ ل پلا ئێكێ دهێت، بۆ زانین ئه‌ز به‌رده‌وام ل ده‌نگێن خۆش دگه‌ڕیێم و ل سالا بۆری من دو ده‌نگێن نوو دیاركرن، یێ ئێكێ عه‌دنان ته‌یمۆر ژ دهۆكێ، یا دویێ ژی ئیله‌یدا كو ژ باكۆرێ كوردستانێ بوو، نوكه هه‌ردویان جهێ خوه دناڤ خه‌لكی دا كریه و خودان جه‌ماوه‌رن.
ل دووماهیێ گۆت: ده‌مه‌كه ئه‌ز یێ ل ده‌نگێ باشترین كچ ل ده‌ڤه‌را به‌هدینان دگه‌ڕم، ده‌نگێن خۆش هه‌نه لێ هێشتا من چو ده‌نگێن ل دووف دلێ خوه نه‌دیتی نه كو ببیته شانازیێ بۆ مه هه‌موویان، بۆ زانین من ل گه‌ل گه‌له‌ك هونه‌رمه‌ندێن دهۆكێ كاركریه، ژوانا عه‌بدولقه‌هار زاخۆیێ و بلند ئیبراهیم و كاروان كامل و هه‌ڤال ئیبراهیم، له‌ورا دشێم بێژم ده‌ڤه‌را به‌هدینان یا زه‌نگینه ب هونه‌رێ خوه، هه‌روه‌سا كه‌سێن ده‌نگ خۆش ژی.
