ئه‌مه‌ل سه‌عید: سترانێن ئه‌ز دبێژم من دڤێت بۆ دیرۆكێ بمینن
دهۆك، شاكر ئه‌تروشی:
ئه‌مه‌ل سه‌عید كورده، سترانبێژ و پێشكێشكارا به‌رنامێ (مرواریه‌كانی غۆربه‌ت) كو نوكه ل وه‌لاتێ بریتانیا دژیت، د دیداره‌كێ دا بۆ رۆژناما ئه‌ڤرۆ دیاركر، ئه‌و ل سالا 1976 ل باژێرێ كه‌ركووكێ ژدایكبوویه، دووڤدا مالا وان چووینه باژێرێ سلێمانیێ و ل وێرێ مه‌زن بوویه، هه‌ر ل وێرێ حه‌زا سترانگۆتنێ بۆ چێبوویه، له‌ورا ل سالا 1993/ 1994چوویه په‌یمانگه‌ها هونه‌رێن جوان/ پشكا مۆزیكێ و هێشتا قوتابی ل قوناغا ئێكێ یا په‌یمانگه‌هێ سترانا خوه یا ئێكێ ب ناڤێ (ده‌ریا) تۆماركریه، ئه‌و ستران ژ په‌یڤێن ره‌ئۆف بێگه‌رد و ئاوازا هونه‌رمه‌ندێ مه‌زن ئه‌نوه‌ر قه‌رداغی بوو، هه‌تا نوكه ئه‌لبۆمه‌ك و سیه ستران و ده‌ه كلیپ هه‌نه، دووماهی كلیپا وێ ژی ب ناڤێ (عه‌شق چیه؟ ) ل حه‌فتیا بۆری به‌لاڤ بوو، كو ژ وێنه‌كرن و ده‌رهێنانا هونه‌رمه‌ند سۆران سۆرانی بوو.
ئه‌مه‌لێ گۆت: ل سالا 2004 ئه‌م ژ كوردستانێ ده‌ركه‌فتین و هاتینه باژێرێ له‌نده‌ن، پایته‌ختێ وه‌لاتێ بریتانیا دژین، من دو كچ هه‌نه، هه‌ڤژینێ من یێ دووره ژ كارێ هونه‌ری، به‌لێ پشته‌ڤانه‌كێ بهێزه و ئه‌و سپۆنسه‌ریا كارێن من دكه‌ت، ل ڤێره من پشكداری د گه‌له‌ك ئاهه‌نگ و به‌رنامێن هونه‌ری دا كریه، هه‌روه‌سا چه‌ند ستران بۆ ده‌ستپێكا فلم و دراما تۆماركرینه، ل 2014 ئه‌لبۆما منا ئێكێ هاته به‌لاڤكرن، كو هه‌موو كارێن وێ مه ل كوردستانێ چێكربوون، هه‌ر ل له‌نده‌ن من به‌رنامه‌ك ب ناڤێ (مرواریه‌كانی غۆربه‌ت) ب شێوێ خوه به‌خش چێكر و ژبه‌ركو چو كه‌نال د به‌رهه‌ڤ نه‌بوون مه‌زاختیێن به‌رنامه‌ی بده‌ن من ئه‌و به‌رنامه كو(46) خه‌له‌كه بوون هه‌موو د سۆشیال میدیایێ دا به‌لاڤكرن و سوپاس بۆ خودێ ره‌نگڤه‌دانه‌كا باش هه‌بوو، پشتی سێ سالان من ئاهه‌نگه‌كا مه‌زن دانا و هه‌موو كه‌سێن پشكداری د به‌رنامه‌ی دا كرین هاتنه داخوازكرن و ژلایێ منڤه هاتنه خه‌لاتكرن و بڤی ره‌نگی من دووماهی ب به‌رنامه‌ی ئینا، چنكو گه‌له‌كا ب زه‌حمه‌ته سێ سالان تۆ به‌رنامه‌كی ل سه‌ر كیستێ خوه چێكه‌ی، بۆ زانین من ستران ب كوردی و ئنگلیزی ژی گۆتینه، لێ حه‌زناكه‌م به‌لاڤ كه‌م، چنكو من دڤێت ئه‌و سترانێن دبێژم بۆ دیرۆكێ بمینن.
