ئه‌میرا هه‌ڤڕكیێ ل گه‌ل ژیانێ دكه‌ت
خانكێ، دلڤین ره‌شید:
ئه‌میرا هانی، كچه‌كا خه‌لكا شنگارێ یه، پشتی كاره‌ساتا وی باژێرێ ل سالا 2014 وه‌كو هزاره‌ها كه‌سێن دی ژبه‌ر زۆلما تیرۆرستێن داعش باژێرێ خوه بجه هێلان و ئاواره‌ی ده‌ڤه‌رێن هه‌رێمێ بوون، لێ پشتی بۆرینا دوسالان و نه‌مانا داعش جاره‌كا دی ڤه‌گه‌ڕیانه باژێرێ خوه شنگارێ، پشتی ده‌مه‌كێ كێم تۆشی نه‌خۆشیه‌كا پیستی بوو، ب گۆتنا وێ ل ده‌ستپێكێ بۆ وێ گه‌له‌كا نه‌خۆش بوو، و هه‌ست ب شه‌رمێ دكر، لێ ب بۆرینا ده‌می ب تشته‌كێ سرۆشتی وه‌رگرت و دبێژیت: من دڤێت هه‌ڤڕكیێ ل گه‌ل ژیانێ بكه‌م.
ناڤهاتیێ هێشتا بۆ رۆژناما ئه‌ڤرۆ گۆت: ل ده‌ستپێكێ ئه‌ز نه‌دشیام ژ مال ده‌ركه‌ڤم، چنكو گۆتنێن خه‌لكی ئه‌ز د ئێشاندم، به‌لێ هێدی هێدی من ئه‌ڤ كراسێ شه‌رمێ هاڤێت، چنكو نۆشداران گۆته من ئه‌ڤه نه‌خۆشیه ل هه‌موو جیهانێ هه‌یه و گه‌له‌ك كه‌س ڤه‌گرتینه، له‌ورا من بڕیاردا هه‌ڤڕكیێ ل گه‌ل ژیانێ بكه‌م و ئێكسه‌رمن وێنێن خوه ل ئه‌كاوه‌نتێ خوه یێ فه‌یسبووكی به‌لاڤكرن، چنكو ئه‌ڤه دیاریه‌كه خودێ دایه من و ئه‌ز یا رازیمه، و من دڤێت بڤێ رێكێ هاریكاریا وان كه‌سان بكه‌م یێن تۆشی نه‌خۆشیێن پیستی بووین، هه‌روه‌سا ئێك ژ هیڤیێن من ئه‌و بوو ببمه نمایشكارا جلكان و من ئه‌ڤ چه‌نده د سۆشیال میدیایێ دا بجه ئینا، و داخوازێ ژ هه‌ر كه‌سه‌كی دكه‌م خودان ئیره‌دابن و به‌رده‌وام كاربكه‌ن دا بگه‌هنه خه‌ونێن خوه و پێ شاد ببن.
