ئه‌زموون خه‌لاتێ باشترین فلم ل فیسته‌ڤاله‌كا جیهانی وه‌رگرت
دهۆك، زنار تۆڤی:
فلمێ سینه‌مایی (ئه‌زموون) كو ژ ده‌رهێنانا سینه‌ماكارێ كورد (شه‌وكه‌ت ئه‌مین كوركی) یه، و ژ به‌رهه‌مئینانا (مه‌مه‌د ئاكتاش) یه، خه‌لاتێ باشترین فلم ل فلمه فیسته‌ڤالا نێڤده‌وله‌تی یا ڤیكتۆریا ل وه‌لاتێ كه‌نه‌دا وه‌رگرت، ڤی فلمی به‌ری نوكه، پشكداری د چه‌ندین فلمه فیسته‌ڤالێن جیهانی دا كریه و خه‌لاتێ ره‌خنه‌گرێن نێڤده‌وله‌تی ل فیسته‌ڤالا كارلۆڤی ڤاری، خه‌لاتێ باشترین سیناریۆ ل تیرانا و خه‌لاتێ UNFPA ل فیسته‌ڤالا قاهیره ل وه‌لاتێ مسرێ وه‌رگرتینه.
ده‌رهێنه‌رێ وی فلمی د دیداره‌كێ دا بۆ رۆژناما ئه‌ڤرۆ دیار كركو فلمێ وی ژلایێ هه‌ردو كۆمپانیێن (میتۆس فلم و مه‌ستی فلم) و ب پشته‌ڤانییا وه‌زاره‌تا ره‌وشه‌نبیری و لاوان یا حكومه‌تا هه‌رێما كوردستانێ هاتیه به‌رهه‌مئینان، ئه‌ڤ فلمه ل باژێرێ سلێمانیێ هاتییه وێنه‌كرن و ستافه‌كێ خودان شیان كار تێدا كرینه و ماوێ فلمی ژی ٩٠ خوله‌كن، ئه‌ڤ فلمه، به‌رهه‌مێ هه‌ڤپشك یێ هه‌رێما كوردستانێ و هه‌ردو وه‌لاتێن ئه‌لمانیا و قه‌ته‌ره، و كۆمه‌كا ئه‌كته‌رێن پیشه‌كار رۆل تێدا گێراینه وه‌كو: ئاڤان جه‌مال، ڤانیا سالار، حسێن حه‌سه‌ن، شوان عه‌تۆف و هشیار زیرۆ نێروه‌یی، هه‌روه‌سا ئه‌ڤه فلمێ چارێ یێ سینه‌مایی یێ ده‌رهێنه‌ر (شه‌وكه‌ت ئه‌مین كوركی) یه، كو ئه‌و ژی فلمێن (ده‌ربازبوون ژ غۆبارێ، كیك ئۆ ، بیره‌وه‌ریێن سه‌ر به‌ری) ئه‌ڤان فلمێن سینه‌مایی پشكداری د گه‌له‌ك فلمه فیسته‌ڤالێن گرنگ یێن جیهانیدا كریه و چه‌ندین خه‌لاتێن جیهانی وه‌رگرتینه.
