هونه‌رمه‌ندێن ده‌ڤه‌را هه‌ورامان گازنده ژ وه‌زیرێ ره‌وشونبیری هه‌نه
هه‌ورامان، عه‌زیز هه‌ورامی:
جه‌لال حۆسێن، هونه‌رمه‌ندێ به‌رنیاسێ ده‌ڤه‌را هه‌وره‌مان، د دیداره‌كێ دا بۆ ئه‌ڤرۆ دیاركر كو ده‌ڤه‌را وان گه‌له‌ك زه‌نگینه ب هونه‌ری، ب تایبه‌ت ژی سترانان كو سترانێن وێ ده‌ڤه‌رێ تایبه‌تمه‌ندیا خوه هه‌یه و پتریا هونه‌رمه‌ندێن وێ ده‌ڤه‌رێ گازندان ژوێ چه‌ندێ دكه‌ت كو وه‌كو پێدڤی گرنگی ب هونه‌رمه‌ند و هونه‌رێ ده‌ڤه‌ران وان نه‌هاتیه دان، هه‌روه‌سا دبێژیت من ئاگه‌ه ژێ نه‌بووینه كو جاره‌كا بتنێ ژی وه‌زیرێ ره‌وشه‌نبیری (كو خه‌لكێ ده‌ڤه‌را هه‌وره‌مانه) هاریكاریا هونه‌رمه‌نده‌كێ وێ ده‌ڤه‌رێ كربیت و ئه‌ڤه ژی جهێ پرسیارێ یه.
جه‌لال گۆت: ماده‌م وه‌زیرێ ره‌وشه‌نبیری خه‌لكێ ده‌ڤه‌را هه‌وره‌مانه نوكه ئه‌و باش دزانین كو ده‌ڤه‌رامه ب هونه‌ری یا زه‌نگینه و پێدڤی بوو پلانه‌ك بۆ باشتر خزمه‌تكرنا هونه‌رمه‌ند و هونه‌رێ ده‌ڤه‌رێ هه‌با، لێ بۆچی ناكه‌ت؟ نوزانم بلا به‌رسڤ بۆ وی بیت، بۆ زانین مه ل ده‌ڤه‌رێ هونه‌رمه‌ندێن باش د هه‌موو واراندا هه‌نه و هه‌كه وه‌زیر یان وه‌زاره‌تا ره‌وشه‌نبیری هاریكاریا مه بكه‌ن دێ شێین به‌رهه‌مێن باش چێكه‌ین.
ل دۆر نووترین كارێ خوه یێ هونه‌ری ژی گۆت: من سترانه‌كا تایبه‌ت ل دۆر كه‌ركووكێ تۆماركریه و من گوه لێ نه‌بوویه به‌ری من سترانبێژه‌كێ ڤێ ده‌ڤه‌رێ سترانه‌ك ب كه‌ركووكێ گۆت بیت، هه‌روه‌سا من هێشتا ستران هه‌نه په‌یڤ و ئاواز دحازرن، لێ من شیان نینن تۆماربكه‌م و هه‌كه هاریكاریا من بكه‌ن دێ كلیپێن باش و پرۆفیشینال چێكه‌م.
