هونه‌رمه‌نده‌كێ زاخۆ دێ بیته دادوه‌ر د لژنا دیاركرنا خه‌لاتێ (كۆردش ئۆسكار) دا
دهۆك، شاكر ئه‌تروشی:
مه‌هدی مۆنێر، هونه‌رمه‌ندێ به‌رنیاسێ باژێرێ زاخۆ، د دیداره‌كێ دا بۆ رۆژناما ئه‌ڤرۆ دیاركر كو به‌ری چه‌ند رۆژان ئه‌و ب شێوه‌كێ فه‌رمی هاتیه ئاگه‌هداركرن كو ئه‌و وه‌ك دادواره بۆ ڤیسته‌ڤاله‌كا سینه‌مایی یا جیهانی هاتیه دیاركرن و (100) دادوه‌ر ژ (32) وه‌لاتان هاتینه ده‌ستنیشانكرن، كو (27) كه‌س ژ وان ژ ئیراقێ نه و (17) ژوان كوردن.
زێده‌تر گۆت: وه‌كو ئه‌ز ئاگه‌هدار ل سنۆرێ ده‌ڤه‌را به‌هدینان بتنێ ئه‌ز هاتیمه ده‌ستنیشانكرن ژ بۆ هندێ كو ببمه دادواره ل وێ فیسته‌ڤالێ و هه‌كه كه‌سه‌كێ دی یان پتر هه‌بن ژی هه‌تا نوكه من چو پێزانین ل سه‌ر نینن، لێ یا ئه‌ز دزانم نێزیكی بیست رۆژانه به‌رهه‌ڤیێن دهێنه كرن ب تایبه‌ت ژی وه‌كو راگه‌هاندن و هه‌تا 25 ڤێ هه‌یڤێ دێ به‌رده‌وام فلم هێنه وه‌رگرتن و پشتی ژ لایێ مه هه‌ر (100) دادوه‌ران ڤه دهێنه سه‌نگاندن ئه‌و فلمێ دبیته یێ ئێكێ دێ هه‌موو ستافێ فلمی هه‌ر ژ نڤیسه‌ری هه‌تا هه‌موو ئه‌كته‌ر و ده‌رهێنه‌ر و كامیره‌ڤان چنه ئه‌مریكا، دا ل وێرێ ئاهه‌نگه‌ك بۆ بهێته كرن، هه‌روه‌سا ل رۆژا 30/3/2022 دێ ئاهه‌نگه‌كا ئێكجار مه‌زن ل باژێرێ هه‌ولێرێ ژی بۆ هێته كرن، كو ئه‌ڤه جارا ئێكێ یه چالاكیه‌كا بڤی ره‌نگی ل هه‌رێما كوردستانێ بهێته كرن، چنكو ب رازیبوونا چه‌ندین وه‌لاتێن مه‌زن ژوانا ئه‌مریكا ئه‌ڤه چه‌نده دێ هێته كرن و خه‌لاته‌ك ب ناڤێ (كۆردش ئۆسكار) دێ هێته پێشكێشكرن بۆ باشترین فلمێ سینه‌مایی و ئه‌ڤ چه‌نده ده‌ستكه‌فته‌كێ مه‌زنه بۆ سینه‌ما كوردی و هه‌موو هونه‌رمه‌ندێن كورد ب تایبه‌ت ژی ئه‌وێن دوارێ سینه‌مایێ دا كاردكه‌ن دێ شانازیه‌كا مه‌زن بڤێ چه‌ندێ كه‌ن، چنكو وه‌كو مه‌گۆتی ئه‌ڤه دێ بیته جارا ئێكێ تشته‌كێ هوسا ل هه‌رێما كوردستانێ بهێته كرن و دانا خه‌لاته‌كی ب ناڤێ (كۆردش ئۆسكار) ئه‌ڤه ژی ده‌ستكه‌فته‌كێ گه‌له‌ك مه‌زنه و جهێ شانازیێ یه كو ئه‌ڤ چه‌نده ل هه‌رێما كوردستانێ ب تایبه‌ت ژی ل هه‌ولێرا پایته‌خت بهێته ئه‌نجامدان.
