چاڤدێرێن سیاسی:رۆسیا كار بۆ زندیكرنا ئێكه‌تیا سوڤیه‌تێ دكه‌ت
ئه‌ڤرۆ:
پشتی كو سه‌رۆكێ رۆسیا ب فه‌رمی راگه‌هاند ئه‌و هه‌ر دو هه‌رێمێن لوهانسك و دۆنتیسك وه‌كو دو ده‌وله‌تێن سه‌ربخوه ناس دكه‌ن، ئه‌مریكا و پرانیا وه‌لاتێن ئێكه‌تیا ئورۆپا خوه بۆ سزادانا رۆسیا به‌رهه‌ڤ دكه‌ن و چاڤدێرێن سیاسی ژی دیار دكه‌ن كو رۆسیا كار بۆ زندیكرنا ئێكه‌تیا سوڤیه‌تێ دكه‌ت.
ڤیلاده‌میر پختین سه‌رۆكێ رۆسیا راگه‌هاند كو ره‌شنڤیسا ناسكرنا هه‌رێمێن لوهانسك و دۆنتیسك یێن سه‌ر ب ئوكرانیا وه‌ك ده‌وله‌تێن سه‌ربخوه ئیمزا كریه و گۆت: (وه‌ك دیرۆكی ژ خوه هه‌ر دو هه‌رێمێن لوهانسك و دۆنتیسك ئانكۆ هه‌رێما دۆمباس ئاخا رۆسیا نه و ئوكرانیا پشكه‌كه ژ دیرۆكا رۆسیا و د سه‌رده‌مێ له‌نین دا شاشیه‌ك مه‌زن هاتیه كرن و ب بریارا له‌نین ئوكرانیا كو چ بنه‌مایێ وێ یێ ده‌وله‌تبوونێ نه‌بوو وه‌ك ده‌وله‌ت هاته قه‌بوولكرن و هه‌رێمێن لوهانسك و دۆنتیسك و هه‌رێما قرم ب ئوكرانیا ڤه هاتنه گرێدان، لێ ئه‌ڤرۆ ئوكرانیا زۆرداریێ ل سه‌ر هه‌ردو هه‌رێمان دكه‌ت و زمانێ رۆسی پشتگوه دخیت و مافێ وه‌لاتیێن رۆس ژی بنپێ دكه‌ت كو ئه‌و یه‌ك ب چو ره‌نگه‌كێ ژ ئالیێ رۆسیا ڤه ناهێته قه‌بوولكرن).
د پشكه‌كا دی یا داخۆیانیا خوه دا ژی سه‌رۆكێ رۆسیا راگه‌هاند كو ئوكرانیا بوویه ناڤه‌نده‌كا پیلانێن ئه‌مریكا، ئه‌مریكا و ناتۆ پیلانێن خوه ل سه‌ر ئوكرانیا دمه‌شینن و دخوازن ئوكرانیا ببیته خوه‌دان چه‌كێن ئه‌تۆمی و گۆت: (دبیت ب فه‌رمی ئوكرانیا هه‌تا نها نه‌بوویه ئه‌نداما ناتۆ لێ هه‌موو بنه‌مایێن ناتۆ نها ل ئوكرانیا نه و به‌رده‌وام چه‌كێن مۆدێرن دده‌نه ئوكرانیا و بسپۆرێن سه‌ربازی یێن ناتۆ سه‌رپه‌ر‌شتیا هێزێن سه‌ربازی یێن وێ دكه‌ن و ب ڤێ یه‌كێ ئارامیا هه‌رێمێ تێك دده‌ن و ئه‌م نه‌شێین ل هه‌مبه‌ر ڤان بنپێكرن و ده‌ستێوه‌ردانێن ناتۆ و ئه‌مریكا بێده‌نگ بمینین و ژ ئه‌ڤرۆ پێڤه ئه‌م ب فه‌رمی ده‌وله‌تبوونا هه‌ر دو هه‌رێمێن لوهانسك و دۆنتیسك قه‌بوول دكه‌ین).
ل هه‌مبه‌ر داخۆیانیا سه‌رۆكێ رۆسیا، جۆ بایدن سه‌رۆكێ ئه‌مریكا، ئێكه‌تیا ئورۆپا، سكرتێرێ گشتی یێ هه‌ڤپه‌یمانیا ئه‌تلانتیك (ناتۆ) و سه‌رۆك كۆمارێ ئوكرانیا ب داخۆیانیێن جودا جودا ژ ئالیێ رۆسیا ڤه ناسكرنا هه‌ردو هه‌رێمێن سه‌ر ب ئوكرانیا وه‌ك ده‌وله‌تێن سه‌ربخوه ره‌تكرن و راگه‌هاندن كو رۆسیا به‌هانه‌یان دروست دكه‌ت دا كو ئوكرانیا ب ته‌مامی داگیر بكه‌ت و ئه‌مریكا، ناتۆ و ئێكه‌تیا ئورۆپا ئاشكرا كرن كو ئه‌و دێ سزایێن مه‌زن یێن ئابووری، سیاسی و سه‌ربازی ب سه‌ر رۆسیا بسه‌پینن و ژ نها و پێڤه دێ هه‌رێمێن لوهانسك و دۆنتیسك ژی بكه‌ڤنه د چارچۆڤێ سزایێن وان دا).
هه‌ردو هه‌رێمێن ناڤهاتی ئانكۆ ب گشتی هه‌رێما دۆمباس ب ژێده‌رێن خوه یێن سروشتی و ب ئاخا خوه ده‌وله‌مه‌ندن و ل وان هه‌ر دو هه‌رێمان ئاسن، زێر، ئه‌لماس و ره‌ژی گه‌له‌ك هه‌یه و رۆسیا ژ به‌ر هندێ ژی گرنگیێ دده‌ته وان هه‌ر دو هه‌رێمان.
چاڤدێرێن سیاسی ژی دیار دكه‌ن كو رۆسیا نها كار بۆ زندیكرنا سوڤیه‌تێ دكه‌ت و به‌ری نها ژی هه‌رێما قرمێ ژ ئالیێ رۆسیا ڤه هاته داگیركرن و رۆسیا ل گه‌ل چینێ كار دكه‌ن كو به‌ره‌یه‌كێ ل دژی ئه‌مریكا و ناتۆ دروست بكه‌ن، ژ به‌ر هندێ ژی رۆسیا ب چو ره‌نگه‌كێ رێ ناده‌ت و ناهێلیت كو ناتۆ هێزێن خوه ل سه‌ر سنۆرێن وێ بجه بكه‌ت و بریارا پۆتینی ژی هه‌ر بۆ هندێ بوو، هه‌كه ئه‌مریكا و ئورۆپا ژ بلی سزادانا رۆسیا ب كریاری تشته‌كێ ل دژی رۆسیا نه‌كه‌ن پۆتین دشێت گه‌له‌ك تشتێن دی ژی ل دژی ئورۆپا و ئه‌مریكا بكه‌ت.
