زانا جه‌به‌لی: هه‌تا نوكه چو هه‌لبه‌ستڤانان په‌یڤێن خوه نه‌داینه من
ئه‌ڤرۆ، كاوین:
هونه‌رمه‌ند (زانا جه‌به‌لی) به‌رده‌وام كار ل سه‌ر به‌رهه‌م و په‌یڤ و ئاوازێن نوو دكه‌ت و تا نوكه چه‌ندین په‌یڤ و ئاوازێن وی ژ ئالیێ چه‌ندین هونه‌رمه‌ندان ڤه هاتینه گۆتن و ئه‌و دبێژیت ئه‌و نه‌یێ په‌شیمانه كو وی ئه‌و ستران داینه وان هونه‌رمه‌ندان.
زانا جه‌به‌لی خویا كر كو: نوكه ئه‌و كار ل سه‌ر چه‌ند به‌رهه‌مان دكه‌ت بۆ سه‌ر سالا كوردی نه‌ورۆزێ و تایبه‌ت هنده‌ك سترانێن له‌زگین، لێ ئه‌و وێ سوزێ ناده‌ت كا دێ تا وی ده‌می ب دووماهی هێن و به‌لاڤ كه‌ت یان نه، لێ د هه‌مان ده‌م دا دێ كار ل سه‌ر وان سترانان كه‌ت كو گه‌ل ستایلێ وی بن، هه‌تا نوكه پتری ٢٠ به‌رهه‌مان ل به‌ر ده‌ستێ وی هه‌نه.
ده‌رباره‌یی وێ چه‌ندێ بۆچی هه‌تا نوكه بتنێ ئه‌و وان سترانان دبێژیت كو ژ په‌یڤ و ئاوازێن وی ب خوبن، ئه‌و دبێژیت: تا نوكه چ هه‌لبه‌ستڤانان په‌یڤێن خوه نه‌داینه من كو ئه‌ز بكه‌مه ستران، لێ هیڤیدارم ئه‌گه‌ر یێن باش هه‌بن دێ بێژم بۆچی نه، ژ به‌ر كو ئه‌ز نه هه‌لبه‌ستڤانم.
زانا وێ چه‌ندێ ژی ئاشكرا دكه‌ت كو گه‌له‌ك وێ پرسیارێ دكه‌ن و دبێژنه من ئه‌و سترانێن تو دبێژیی چیرۆكه‌كا راست و دروست هه‌یه، لێ ئه‌ز دبێژم ئه‌و نه چیرۆكێن منن، به‌لكو ئه‌ز ل دووڤ خه‌لكی و دچم كا حه‌ز ژ چ دكه‌ن و دبینم خه‌لكێ مه پتر خوه د وان سترانان دا دبین له‌وما وان دبێژم، لێ بۆ قووناغا بهێت دێ ستران و به‌رهه‌مێن من گه‌له‌ك جوداتر بینن ژ یێن به‌ری نوكه.
