كچلدار ئوغلۆ: ژ بۆ سه‌روه‌ریا ئاشتیێ و پێكڤه‌ژیانێ كار دكه‌ین
ب، سه‌رجان مه‌حمود:
كه‌مال كلچدار ئوغلۆ سه‌رۆكێ گشتی یێ پارتیا گه‌ل یا كۆماری (جه‌هه‌په) ل باژێرێ ئسته‌نبۆلێ د كۆمبوونه‌كا جه‌ماوه‌ری یا بۆ ئاشتیێ دا راگه‌هاند كو ئه‌و خوه ئاماده دكه‌ن ل گه‌ل هه‌موو ئالیێن سیاسی و جڤاكی یێن توركیا پێكڤه ده‌ست ب قۆناغه‌كا نوو بكه‌ن و گۆت: (ئه‌ز وه‌ك سه‌رۆكێ ئۆپۆزسیۆنێ و ده‌ستهه‌لاتا بهێت یا توركیا دبێژم كو پێدڤیا وه‌لاتێ مه ب ئاشتیه‌كا سه‌رتاسه‌ری هه‌یه و ئه‌ركێ من یێ سه‌ره‌كیه ئه‌وه كو ئاشتیێ ل توركیا بجه بكه‌م، مه دڤێت هه‌موو پێكهاتێن ل توركیا نێزیكی هه‌ڤدو ببن و پێكڤه ده‌ست ب قۆناغه‌كا نوو یا ئاشتیێ و پێكڤه‌ژیانێ بكه‌ن، ئه‌م نها ب هه‌موو ره‌نگه‌كێ بۆ هندێ كار دكه‌ین).
ناڤهاتی د پشكه‌كا دی یا ئاخڤتنا خوه دا ژی راگه‌هاند كو ده‌ستهه‌لاتا ئاكپارتیێ ل سه‌ر بنه‌مایێ ناكۆكیێن د ناڤبه‌را پێكهاتێن توركیا دا شیا ژیێ ده‌ستهه‌لاتا خوه درێژ بكه‌ت، به‌رپرسێن ئاكپارتیێ د ژیانه‌كا گه‌له‌ك خوه‌ش دا دژین و ره‌وشا خه‌لكی ژی گه‌له‌ك خرابه و گۆت: (ب به‌لگه هاتیه سه‌لماندن كو د ناڤ ده‌ه سالێن بۆری دا 700 هزار وه‌لاتیێن مه ژ توركیا كۆچبه‌ر بووینه و به‌رێ خوه داینه ئورۆپا و وه‌لاتێن دی و ل ده‌رڤه ل پاشه‌رۆژا خوه دگه‌رن، بۆ ڤێ چه‌ندێ ئه‌ز دبێژم كو پێدڤیا من ب كۆچك و ژیانه‌كا ده‌وله‌مه‌ند نینه و پێدڤیا من و هه‌موو وه‌لاتیان ب ئاشتیێ هه‌یه و ئه‌ز دخوازم ئاشتیێ ل هه‌موو توركیا بجه بكه‌م و من دڤێت ئێدی شه‌ر ل توركیا نه‌مینیت).
سه‌رۆكێ گشتی یێ جه‌هه‌پێ د دووماهیا ئاخڤتنا خوه دا ژی راگه‌هاند كو د ڤان رۆژێن ده‌ربازبوویی دا ل گه‌ل گه‌له‌ك ئالیان كۆمبوویه و بۆ وان دیار كریه كو ئێدی پێدڤیا توركیا ب ئاشتێی و ده‌ستپێكرنا قۆناغه‌كا نوو هه‌یه و دڤێت هه‌موو هێزێن سیاسی ب تایبه‌تی ژی ئالیێن ئۆپۆزسیۆنێ و سازیێن جڤاكێ سڤیل بۆ ئاشتیێ و پێكڤه‌ژیانێ كار بكه‌ن و گۆت: (ئێدی ده‌م یێ هاتی كو ئه‌م ب جهێ شه‌ری بۆ ئاشتیێ كار بكه‌ین، پێدڤیا گه‌لێ توركیا ب ئاشتیێ هه‌یه، مخابن ده‌ستهه‌لاتا نها ب جهێ كو بۆ ئاشتیێ و خزمه‌تا وه‌لاتیان كار بكه‌ت ناكۆكیان دروست دكه‌ت، ژ به‌ر هندێ ژی مه دڤێت ب دوورخستنا ئاكپارتیێ ژ ده‌ستهه‌لاتێ ده‌ست ب قۆناغه‌كا نوو بكه‌ین، قۆناغا نوو ژی دێ قۆناغا ئاشتیێ و چاره‌سه‌ركرنا هه‌موو پرسێن نها یێن توركیا بیت).
