كۆنفرانسێ به‌رلینێ: پێدڤیا توركیا و هه‌موو جیهانێ ب ئاشتیێ هه‌یه
ب، سه‌رجان مه‌حمود:
كۆنفرانسێ به‌رلینێ ئانكۆ كۆنفرانسێ دویێ یێ دیموكراسیێ و ئازادیێ ل باژێرێ به‌رلین یێ پایته‌ختێا ئه‌لمانیا برێڤه چوو و د كۆنفرانسی دا ب ده‌هان سازیێن سڤیل، كۆمه‌له و رێكخستنێن دیموكراسیێ و ب ده‌هان كه‌سێن ئه‌كادیمی، سیاسه‌تمه‌دار، رۆژنامه‌ڤان، نڤیسه‌ر و ره‌وشه‌نبیرێن تورك، كورد، عه‌له‌وی، سوریانی و ئه‌رمه‌نی پشكدار بوون و پشتی كۆنفرانسێ جان دوندار رۆژنامه‌ڤان و نڤیسه‌رێ ناڤدار یێ توركیا ل سه‌ر ئه‌نجامێن كۆنفرانسێ ئاخڤی و راگه‌هاند كو كۆنفرانسێ دویێ یێ دیموكراسیێ و ئازادیێ ل باژێرێ به‌رلین برێڤه چوو و گۆت: (كۆنفرانس د ده‌مه‌كی دا هاته گێران كو رۆسیا ئێرشه‌كی دژوار كریه سه‌ر ئۆكرانیا و دیسان ل توركیا زۆرداریا ل سه‌ر كوردان و هه‌موو ته‌خ و چینێن جڤاكێ دژوار بوویه و مخابن ل به‌ر چاڤێن جیهانێ كاره‌ساتێن مه‌زن یێن مرۆڤی روو دده‌ن و هێڤیدارین د ده‌مه‌كی نێزیك دا ئه‌ڤ شه‌ره راوه‌ستیت و گه‌لێ ئۆكرانیایێ دوباره د ناڤا ئارامیێ دا بژین).
جان دوندار هه‌روه‌سا راگه‌هاند توركیا به‌ر ب هه‌لبژارتنان ڤه دچیت و ب نێزیكبوونا ده‌مێ هه‌لبژارتنان زۆرداریێن ده‌ستهه‌لاتێ ل هه‌موو قادێن ژیانێ دژوارتر دبیت و ل هه‌مبه‌ر دا گه‌لێ توركیا داخوازا ئازادیێ و دیموكراسیێ دكه‌ن و گۆت: (ب شه‌رێ ئوكرانیا دوباره مه‌ترسیا رژێمێن تاكه‌كه‌سی كه‌ڤته رۆژه‌ڤا جیهانێ و جیهانا مه ب چاڤێن خوه مه‌ترسیا رژێمێن تاكه‌كه‌سی دیت و ل توركیا ژی ژ به‌ر ده‌ستهه‌لاتا تاكه‌كسی زۆرداریه‌كا مه‌زن ل كوردان و پێكهاتێن دی یێن جڤاكی دهێته كرن، ب سه‌دان رۆژنامه‌ڤان، نڤیسه‌ر و زانایێن كورد و تورك د زیندانان دانه و ره‌وشا ژیانا وه‌لاتیان ژی خرابتر لێ دهێت، ئه‌و یه‌ك ژی نیشا دده‌ت كو ب زۆرداریێ و ب ده‌ستهه‌لاتێن تاكه‌كه‌سی چو ده‌مه‌كێ وه‌لات پێش ناكه‌ڤن و ژ به‌ر هندێ ژی د كۆنفرانسێ دویێ یێ به‌رلینێ دا هه‌موو پشكداربوویان دیار كرن كو نها پتر ژ هه‌ر ده‌مه‌كێ پێدڤیا توركیا ب ئاشتیێ و پێكڤه‌ژیانێ هه‌یه و ده‌ستهه‌لاتا نها ژی چو پرۆژه بۆ ئاشتیێ نینن).
ناڤهاتی ئه‌و یه‌ك ژی دیار كر كو مه دڤێت ده‌ستهه‌لاتا توركیا و هه‌روه‌سا یێن كو دخوازن ب رێیا شه‌ری و زۆرداریا جیهانێ برێڤه ببه‌ن ڤێ راستیێ باش بزانن كو سه‌رده‌مێ زۆرداریێ و شه‌ری ب دووماهی هاتیه، نها پتر ژ هه‌ر ده‌مه‌كێ پێدڤیا مرۆڤاتیێ ب جیهانه‌كا ئارام و دوور ژ شه‌ری هه‌یه، ژ به‌ر هندێ ژی دڤێت رۆسیا ئێرشێن خوه بده‌ته راگرتن و پێدڤیه ل توركیا ژی ده‌ست ب قۆناغه‌كا نوو یا ئاشتیێ و چاره‌سه‌ركرنا پرسا كوردی بهێته كرن، هه‌موو وه‌لاتیێن توركیا پشته‌ڤانیێ ل ئاشتیێ دكه‌ن، چونكو ژ به‌ر شه‌ری هه‌تا نها زیانێن مه‌زن گه‌هشتینه توركیا و چو كه‌سه‌كێ شه‌ر نه‌ڤێت.
