رۆژنامه‌كا ئه‌مریكی به‌حسێ پیلانا نوو یا پۆتینی ل ئۆكرانیایێ دكه‌ت
ئه‌ڤرۆ:
رۆژنامه‌كا ئه‌مریكی دیار دكه‌ت كو رۆسیا خوه بۆ شه‌ره‌كێ ده‌مدرێژ ل ئۆكرانیایێ به‌رهه‌ڤ دكه‌ت و نها رۆسیا دڤێت ب رێیا چه‌كدارێن سوری و چیچانی شه‌رێ باژێران بكه‌ت، چونكو ئه‌مریكا و ناتۆ به‌رهه‌ڤیا هندێ كرینه و پۆتین ژی دڤێت ب هه‌ر ره‌نگێ هه‌ی د شه‌ری دا سه‌ركه‌ڤیت.
رۆژناما وول ستریت جۆرنال یا ئه‌مریكی د راپۆرته‌كێ دا راگه‌هاند كو پۆتین و به‌رپرسێن دی یێن رۆسیا ده‌ستپێكێ هزرا هندێ كربوون كو بشێن د ماوه‌یێ چه‌ند رۆژان دا ب ته‌مامی ئۆكرانیایێ داگیر بكه‌ن، لێ خوه‌راگریا خه‌لكێ ئۆكرانیا و هه‌روه‌سا هاریكاریا چه‌كی یا ئه‌مریكا و ناتۆ بۆ ئۆكرانیایێ هه‌موو پیلانێن پۆتینی تێكدان و نها پۆتین كار بۆ پیلانه‌كا نوو ل ئۆكرانیایێ دكه‌ت.
د به‌رده‌وامیا راپۆرتێ دا به‌حسێ هندێ ژی هاتیه كرن كو بۆ پۆتینی ئاشكرا بوویه ئه‌مریكا و ناتۆ دخوازن شه‌رێ نها ل ئۆكرانیایێ گه‌له‌ك ڤه‌كێشیت و ب هه‌موو ره‌نگه‌كێ ژی چه‌كان دده‌نه ئۆكرانیایێ، ژ به‌ر هندێ ژی رۆسیا دڤێت شه‌رێ باژێری ل گه‌ل له‌شكرێ ئۆكرانیا ب رێیا چه‌كدارێن چیچانی و سوری بكه‌ت و هه‌ر ژ نها ڤه ده‌ست ب وه‌رگرتنا وان چه‌كداران هاتیه كرن، رۆسیا بۆ هه‌ر مه‌هه‌كێ دێ پتر ژ هزار دۆلاران وه‌كو مووچه ده‌ته چه‌كدارێن سوری دا شه‌رێ له‌شكرێ ئۆكرانیایێ د ناڤ باژێران دا بكه‌ن.
هه‌مان رۆژنامێ ئه‌و یه‌ك ژی دیار كریه كو پۆتینی دڤێت ب هه‌ر ره‌نگێ هه‌ی د شه‌رێ نها ل ئۆكرانیایێ دا سه‌ركه‌ڤیت، چونكو د دووماهی ئاخڤتنا ته‌له‌فۆنی یا د ناڤبه‌را پۆتینی د گه‌ل سه‌رۆكێ فره‌نسا دا پۆتینی ب ره‌نگه‌كێ ئاشكرا بۆ ماكرۆنی دیار كریه كو رۆسیا دڤێت بگه‌هیته ئارمانجێن خوه ڤێجا ب رێیا شه‌ری بیت یان ژی ب رێیا دبلۆماسیێ و هه‌تا رۆسیا نه‌گه‌هیته ئارمانجێن خوه دێ شه‌رێ نها به‌رده‌وام بیت.
چاڤدێرێن سیاسی ژی دیار دكه‌ن كو ئارمانجا سه‌ره‌كی یا ئه‌مریكا و ناتۆ ئه‌وه كو شه‌رێ نها ل ئۆكرانیایێ بۆ چه‌ندین سالان به‌رده‌وام بیت، چونكو ئه‌مریكا و وه‌لاتێن ناتۆ هه‌ست ب هندێ كرینه كو رۆسیا بهێز بوویه و بوویه مه‌ترسی بۆ به‌رژه‌وه‌ندیێن وان، ژ به‌ر هندێ ژی هه‌كه شه‌رێ نها ل ئۆكرانیایێ بۆ ده‌مه‌كێ درێژ به‌رده‌وام بیت ئه‌و یه‌ك دێ بیته ئه‌گه‌ر كو ئابوورێ رۆسیا ژناڤ بچیت، ژ به‌ر هندێ ژی ئه‌مریكا و ناتۆ چه‌كی دده‌نه ئۆكرانیایێ لێ د هه‌مان ده‌می دا به‌رهه‌ڤ نینن كو ل گه‌ل وی وه‌لاتی شه‌رێ رۆسیا بكه‌ن.
دوهی ئاژانسا سپۆتینگ یا رۆسی ژی دیار كر كو له‌شكرێ رۆسیا ب هه‌موو شیانێن خوه به‌رهه‌ڤیان بۆ دۆرپێچكرنا كیێڤ دكه‌ت و هژماره‌كا زێده چه‌كێن گران ژی ل جهێن ستراتیژی بجه بووینه و به‌رده‌وام پایته‌ختێ ئۆكرانیایێ دهێته بوردومانكرن، چونكو رۆسیا دڤێت كێیڤ كۆنترۆل بكه‌ت دا سه‌ركه‌فتنا خوه د شه‌ری دا راگه‌هینیت.
