چه‌ندین كه‌نالێن ناڤخوه و بیانی داخواز ژێ كرینه به‌رهه‌مێ وی بكڕن
دهۆك، زنار تۆڤی:
وێنه‌گر مه‌سعود ئیبراهیم، كو ب مه‌سعود سروشت دهێته نیاسین، خه‌لكێ گوندێ كافیایه‌ل ده‌ڤه‌را دینارتێ، د دیداره‌كێ دا بۆ رۆژناما ئه‌ڤرۆ دبێژیت: ئه‌ڤه نه‌ه سالن ئه‌ز كارێ وێنه‌گریێ دكه‌م، بۆ كارێ وێنه‌گریێ ئه‌ز چوویمه هه‌ر چار پارچێن كوردستانێ و وێنه بۆ هزار جۆرێن گول و گیایان گرتینه، هه‌روه‌سا مه‌ره‌ما من ژ ڤی كاری ئه‌وه، كو هه‌موو جۆرێن گول و گیایێن چیایێن كوردستانێ و هه‌موو جۆرێن بالنده و گیانه‌وه‌ران وێنه بكه‌م.
ناڤهاتی گۆت: هه‌تا نوكه من نێزیكی 350 جۆرێن بالنده و گیانه‌وه‌رێن كویڤی وێنه‌كرینه، د هه‌مان ده‌مدا هژماره‌كا مه‌زن یا فۆتۆیان ژی گرتینه، بۆ وێنه‌كرنا بالنده‌كێ مارگر، ئه‌ز 68 رۆژان مایمه ب وێنه‌كرنا وی بالنده‌یی ڤه، من هه‌موو ژیانا وی وێنه‌كریه، ب شێوێ دكیۆمێنتاری چێكریه، و بۆ چێكرنا ڤیدیۆیه‌كا دكیۆمێنتاری ل سه‌ر ژیانا بالنده‌كێ مرۆڤی پێدڤی ب ساله‌كێ هه‌یه، چونكی دڤێت مرۆڤ ژیانا د هه‌ر چار وه‌رزان دا دیار بكه‌ت، هه‌كه ئه‌و بالنده یێ خوه‌جه بیت، دیسان بالنده‌ك ل كوردستانێ هه‌بوون بۆ ده‌مێ ساله‌كێ ئه‌ز مایمه ب كارێ وێنه‌كرنێ ڤه و هێشتا من ب دووماهی نه‌ئینایه، بۆ زانین هه‌تا نوكه من 80 هزار گیگا یێن ڤیدیۆیی كۆمڤه كرینه، دیسان هه‌تا نوكه من 20 هزار فۆتۆ ژی گرتینه، ل كه‌نالێن (رۆژ، رووداو، كوردستان 24 ، دی ده‌بلیۆ یێ ئه‌لمانی، رووسیا تۆده‌ی یێ رووسی، بی بی سی یێ عه‌ره‌بی، جزیره ئه‌لوه‌سائیقییه) هه‌موویان داخواز ژ من كرینه، كو ئه‌ز به‌رهه‌مێ خوه بده‌مه وان، لێ نوكه ئه‌ز یێ به‌رهه‌مێ خوه مۆنتاژ دكه‌م، من ل به‌ره بده‌مه كه‌نالێن كوردی، من تشتێن گه‌له‌ك جوان و سه‌رنجراكێش وێنه كرینه، هه‌روه‌سا هه‌ر گول و گیایه‌كێ من وێنه‌كری، من ناڤێ وی یێ زانستی ل گه‌ل ئه‌و ده‌ڤه‌را لێ هه‌یی من دیار كرییه و هه‌ر ژ كولیلكێ هه‌تا وه‌راندنا تۆڤكێ خوه من وێنه كریه، هه‌كه بالندێن كوردستانێ بن، هه‌ر ژ چێكرنا هێلینێ هه‌تا فراندنا تێشكێن خوه من وێنه كرینه.
