نزار محه‌مه‌د: د كه‌ڤالێن خوه دا گرنگیێ دده‌مه سرۆشتی
ئه‌ڤرۆ: شاهۆ فه‌رید:
شێوه‌كار (نزار محه‌مه‌د سه‌دیق) د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ گۆت:” ده‌ستپێكا من یا كارێ شێوه‌كاریێ ل ناڤه‌ندا سالێن هه‌شتێیان دا بوو، هه‌روه‌سا من پشكداری د چه‌ندین پێشانگه‌هان دا كریه كو هنده‌ك یێن من بخوه بووینه و هنده‌ك ژی هه‌ڤپشك من ڤه‌كرینه، به‌لێ نابینم پالپشتی هه‌بیت بۆ شێوه‌كاری و ڤه‌كرنا هه‌ر پێشانگه‌هه‌كێ مه‌زاختیێن وێ شێوه‌كار خه‌رجیا وێ ژبه‌ریكا خوه د مه‌زێخیت و هاریكاریێن بچووك هه‌نه ژ لایێ سازیێن حوكمه‌تێ ڤه، به‌لێ كارێ هونه‌ری نه‌بوویه ده‌رگه‌هێ ب ده‌ستڤه‌ئینانا داهاته‌كی بۆ هونه‌رمه‌ندی”.
ناڤهاتی گۆت: “د ناڤ جڤاكێ مه دا حه‌زا دیتنا كه‌ڤالان و كارێن هونه‌ری هه‌یه، به‌لێ ژ به‌ر نه‌بوونا ده‌رفه‌تێ شێوه‌كار نه‌شیایه پێشكه‌فتنێ بێخیته د ناڤ كارێن خوه دا و ب فه‌ر ژی دبینم پێشانگه‌ه ل ناڤا په‌یمانگه‌ها هونه‌رێن جوان بهێته ڤه‌كرن دا كو قوتابی بخوه هزرێن باش وه‌رگریت و په‌یوه‌ندی دناڤبه‌را قوتابی و هونه‌رمه‌ندی دا په‌یدابیت”.
ل دووماهیێ ژی گۆت: “ئه‌ز د كارێ خوه یێ هونه‌ری دا پتر گرنگیێ دده‌مه سرۆشتی ب گشتی و یێ كوردستانێ ب تایبه‌تی، بۆ ئه‌نجامدانا هه‌ر كاره‌كێ هونه‌ری پێدڤی ب ده‌مه‌كێ باش و ماندووبوونێ مه دا كو بشێم كاره‌كێ جوانێ هونه‌ری ئه‌نجام بده‌م”.
