بایدن: شه‌ڕێ مه و رۆسیا دێ بیته ئه‌گه‌رێ روودانا شه‌ڕه‌كێ جیهانی
ب، سه‌رجان مه‌حمود:
جۆ بایدن سه‌رۆكێ ئه‌مریكا د كۆنفرانسێ ئه‌ندامێن دیمۆكراسیخوازان د جڤاتا نوونه‌رێن ئه‌مریكا دا راگه‌هاند كو ئه‌و دێ ل هه‌مبه‌ر رۆسیا هه‌ر واری دا هه‌ڤكاریا ئوكرانیایێ كه‌ن و گۆت: (ژ بۆ پاراستنا ئاخا ئوكرانیایێ دێ هه‌ڤكاریا وی وه‌لاتی كه‌ین لێ ئه‌م نه‌شێین فرۆكه، تانك و سه‌ربازێن خوه فرێكه‌ین، ژ به‌ر كو بزاڤه‌كا مه یا وه‌سا دێ بهێته واته‌یا راگه‌هاندنا شه‌رێ سێیه‌مین یێ جیهانی و د ره‌وشا نها دا ئانكۆ د ڤێ قۆناغێ دا پێنگاڤه‌كا وه‌سا نه د به‌رژه‌وه‌ندیا ئه‌مریكا و جیهانێ دایه و بۆ ڤێ چه‌ندێ ناكه‌ڤینه د ره‌وشه‌كا وه‌سا دا كو ببیته سه‌ده‌مێ راگه‌هاندنا شه‌ره‌كێ جیهانی).
سه‌رۆكێ ئه‌مریكا هه‌روه‌سا راگه‌هاند ژی كو ئه‌و رۆژانه ل گه‌ل سه‌رۆكێ ئۆكرانیایێ دئاخڤیت و پشته‌ڤانیا خوه بۆ وه‌لاتێ وی دیار دكه‌ت و گۆت: (گه‌له‌ك ئاشكرایه كو پۆتینی دڤێت ب دروستكرنا ناكۆكیان هه‌ڤپه‌یمانیا ناتۆ ژ هه‌ڤدو پارچه بكه‌ت لێ هه‌تا نها د پیلانێن خوه دا سه‌ركه‌فتی نه‌بوویه و ل هه‌مبه‌ر دا مه ل گه‌ل ئێكه‌تیا ئۆرۆپا، ناتۆ و وه‌لاتێنG7 هه‌ماهه‌نگیه‌كا باش دروست كریه و د ئه‌نجام دا نها ئابووریا رۆسیا به‌ر ب هلوه‌شاندنێ ڤه دچیت و ئێدی رۆسیا ب تنێ یه و مه بریارا بڕینا هه‌موو ته‌ڤگه‌رێن ئابووری و بازرگانی ل گه‌ل رۆسیا دایه و دشێم بێژم رۆژ ب رۆژێ ئێدی رۆسیا ته‌نگاڤ دبیت و پێگه‌هێ خوه ژ ده‌ست دده‌ت).
