ئه‌لبۆمه‌كا نوو دێ به‌لاڤ كه‌ت
دهۆك، زنار تۆڤی:
سترانبێژ شه‌ریف ئۆمه‌ری، كو خه‌لكێ باژێرێ قامیشلۆیه ل رۆژئاڤایێ كوردستانێ و ئه‌ڤه چه‌ندین سالن ل وه‌لاتێ ئه‌لمانییا دژیت، د دیداره‌كێ دا بۆ رۆژناما ئه‌ڤرۆ دیاركر كو هه‌تا نوكه وی چه‌ندین سترانێن سینگل و پتر ژ 30 كلیپان به‌لاڤ كرینه و ل چه‌ند رۆژێن بۆری كلیپه‌كا نوو یا ب ناڤێ (كوردستان) به‌لاڤ كریه، كو ژ په‌یڤ و ئاوازێن وی ب خوه بوون، عه‌لی خه‌لیلی كارێ ده‌رهێنانا بۆ كریه و ل وه‌لاتێ ئه‌لمانییا هاتیه وێنه كرن، ئه‌و سترانه به‌حسێ ئێكه‌تیا گه‌لێ كورد و هه‌رچار پارچێن كوردستانێ دكه‌ت، د هه‌مان ده‌مدا دناڤ وێ سترانێ دا وی ناڤێ گه‌له‌ك باژێر و گوندان ئینایه، و ستران ب ستایلێ خوه كه‌ڤن چێكریه.
ناڤهاتی گۆت: ئه‌ز سترانبێژێ ئێكێ بووم ل رۆژئاڤایێ كوردستانێ، كو ستایلێن پۆپ و راپ و هیپۆپ ئیناینه دناڤ مۆزیك و سترانا كوردی دا، من ڤیایه ستایلێ راپێ بێخیته دناڤ مۆزیكا كوردی دا، هه‌روه‌سا من ل به‌ره هنده‌ك سترانێن فولكلۆری ب شێوازێ پۆپ و راپ چێكه‌م و نوكه یێ كاری ل سه‌ر چێكرنا ئه‌لبۆمه‌كا نوو دكه‌م ب ناڤێ ( كوردستان) كو ژ نه‌ه تراكان پێك دهێت، من ل به‌ره د ئه‌ڤ ساله دا به‌لاڤ بكه‌م، دێ چه‌ندین سترانان ژی كلیپ كه‌م و ئه‌لبۆما من دێ ب هه‌مان ستایلێ من یێ به‌ری نوكه بیت، هه‌ر چه‌نده ئه‌ز پتر حه‌ز دكه‌م سترانێن سینگل به‌لاڤ بكه‌م.
