ڤیان عه‌باس: دخوازم هه‌ر كچه‌كا حه‌زا هونه‌ری هه‌بیت مالا وان پشته‌ڤانیێ لێ بكه‌ن
دهۆك، شاكر ئه‌تروشی:
ڤیان عه‌باس، كچه‌كا خه‌لكا دهۆكێ یه، به‌ری سێ سالان هاتیه دناڤ وارێ هونه‌ری دا و هه‌تا نوكه پشكداری د چه‌ند زنجیره دراما دا كریه، و ئه‌و دبێژیت (دڤێت هزار جڤاكی بهێته گوهۆڕین كو ئه‌كته‌ری كاره‌كێ كرێته و نه‌هه‌ر كچه‌كا ببیته ئه‌كته‌ر یا خرابه، ژبه‌ركو ئه‌كته‌ری ئه‌زم، تۆی، یێ دی یه، و ژیانا راستیێ دكه‌ته دكیۆمه‌نته‌ك و دانیته پێش چاڤێن خه‌لكی).
ڤیان، ژ دایكبوویا سالا 1998یه و ده‌رمانسازه، هێشتا گۆت: دژیه‌كێ بچووك دا من گه‌له‌ك بینه‌ریا فلم و دراما دكر، ب بۆرینا ده‌می ئه‌و حه‌ز بۆ من چێبوو كو ئه‌ز ژی دوارێ ئه‌كته‌ریێ دا كاربكه‌م و پشكداریا من یا ئێكێ ل سالا 2020 د زنجیرا (ئاخ و تاخ) یا ده‌رهێنه‌ر حسێن حه‌سه‌ن دا بوو، كو دوێ زنجیرێ دا ئه‌ز ب رۆلێ كچه‌كێ رادبووم ب ناڤێ (كه‌ڤی) هه‌روه‌سا بۆ ئه‌ڤ ساله ژی من پشكداری د زنجیره دراما (ته‌حل و شرین) دا كریه كو بۆ هه‌مان كه‌ناله و ژ ده‌رهێنانا موفه‌ق رۆشدی یه، ل هه‌یڤا ره‌مه‌زانێ دێ هێته نیشادان، هه‌روه‌سا ته‌له‌ڤزیۆنا دهۆك ژی درامایه‌ك ب ناڤێ (چیرۆكێن هه‌ست و رامان) بۆ هه‌یڤا ره‌مه‌زانێ چێكریه، من پشكداری د خه‌له‌كێ دا كریه، كو ده‌رهێنه‌رێ وی سه‌عید مسته‌فایه، پشتی ڤێ درامایێ دێ مه هنده‌ك كارێن دی ژی هه‌بن، لێ بلا ئه‌و بۆده‌مه‌كێ دی بن، بۆ زانین به‌ری نوكه من ریكلام ژی چێكرینه.
ل دووماهیێ گۆت: ژبلی ئه‌كته‌ریێ من كارێ پێشكێشكاریێ ژی كریه و به‌ری نوكه به‌رنامه‌ك بۆ نۆبار تیڤی چێكر بوو، نوكه ژی من ل به‌ره به‌رنامه‌كێ دی بۆ هه‌مان كه‌نال چێكه‌م، و دمالا مه‌دا خویشكا من (ژیان عه‌یاس) كارێ په‌یامنێرێێ دكه‌ت و مالا من هه‌موو پشته‌ڤانێن مه‌نه و دخوازم هه‌ر كچه‌كا حه‌زا كاركرنێ دوارێ هونه‌ری یان راگه‌هاندنێ دا هه‌بیت مالا وان ل شوونا رێگریێ پشته‌ڤانیێ لێ بكه‌ن.
