پارتیێن نهتهوهپهرست و راستگر ل ئۆرۆپا ده‌نگێن خوه زێده‌تر دكه‌ن
ئه‌ڤرۆ، سه‌رجان مه‌حمود:
پشتی نه‌مسا، هنگاریا و ئه‌لمانیا نها ژی ل فره‌نسا پارت و به‌ربژێرێن نهتهوهپهرست و راستگر د هه‌لبژارتنێن سه‌رۆك كۆماریێ دا ده‌نگێن خوه زێده‌تر كرینه، د هه‌لبژارتنا سه‌رۆك كۆماریا فره‌نسا دا مارین لۆپن جارا یه‌كێ یه رێژا ده‌نگێ خوه دگه‌هینیته 24% و د ئۆرۆپا مۆدێرن دا ژ هه‌ر ده‌می زێده‌تر نهتهوهپهرست نێزیكی ده‌ستهه‌لاتێ دبن.
چاڤدێرێن سیاسی ل ئورۆپا دیار دكه‌ن كو ئێك ژ ئه‌گه‌رێن سه‌ره‌كی یێن زێده‌بوونا ده‌نگێن پارتیێن نهتهوهپهرست بابه‌تێ په‌نابه‌رانه، چونكو خه‌لكێ ئۆرۆپا ئێدی په‌نابه‌ران وه‌كو بارگرانی بۆ خوه دبینن، ئه‌و وه‌سا دبینن په‌نابه‌ر بووینه ئه‌گه‌رێ هندێ ره‌وشا ئابووری یا گه‌له‌ك وه‌لاتێن ئۆرۆپا خراب ببیت، ژ به‌ر هندی ژی نها پتر ژ هه‌ر ده‌مه‌كێ وه‌لاتیێن ئۆرۆپی پشته‌ڤانیێ ل وان پارتیێن سیاسی دكه‌ن یێن كو ل دژی هاتنا په‌نابه‌رانن بۆ وه‌لاتێن ئۆرۆپی.
ژین كاموس بسپۆرا سیاسه‌تا ئێكه‌تیا ئۆرۆپا د ڤێ مژارێ دا بۆ ئاژانسا یورۆنیوز یا فره‌نسی راگه‌هاند كو وه‌لاتیێن ئۆرۆپا ل به‌رسڤا هنده‌ك پرسان د وارێن وه‌رگرتنا په‌نابه‌ران، ئێمناهیێ و گه‌له‌ك بابه‌تێن دی دا دگه‌رن و گۆت: (هه‌تا نها پارتیێن لیبرال و چه‌پ و دیموكرات ب دروستی به‌رسڤا پرسێن وه‌لاتیان نه‌داینه و نه‌شیاینه خه‌لكی بۆ پاشه‌رۆژه‌كا باشتر تێبگه‌هینن و د ئه‌نجام دا خه‌لك به‌ر ب پارتیێن نهتهوهپهرست ڤه دچن، رۆژ ب رۆژێ دژبه‌ریا ل هه‌مبه‌ر په‌نابه‌ران زێده‌تر دبیت و بۆ ڤێ چه‌ندێ پێدڤیا پارتیێن دیموكرات، لیبرال و پارتیێن چه‌پ ب نووژه‌نكرنا سیاسه‌تا خوه هه‌یه و هه‌كه ب ڤی ره‌نگی به‌رده‌وام بیت نه دووره ل گه‌له‌ك وه‌لاتێن ئۆرۆپا وه‌ك نه‌مسا پارتیێن نهتهوهپهرست و راستگر بهێنه سه‌ر ده‌ستهه‌لاتێ).
ل ئه‌لمانیا ژی پارتیا ئه‌لتر‌ناتیڤ یا نهتهوهپهرست كو ئه‌ڤ سێ سالن هاتیه دامه‌زراندن ئێدی وه‌ك پارتیا سێیه‌م ل په‌رله‌مانی یه و هژمارا كورسیێن خوه زێده‌تر دكه‌ت و ل نه‌مسا نها پارتیا ئازادیان یا راستگر و نهتهوهپهرست ل سه‌ر ده‌ستهه‌لاتێ یه و ل هنگاریا و سلۆڤاكیا ژی ئێدی ل په‌رله‌مانی كورسیێن نه‌ته‌وه‌په‌رستان گه‌له‌ك زێده بووینه.
ل فره‌نسا ژی مارین لۆپن سه‌رۆكا پارتیا ئێكه‌تیا نه‌ته‌وه‌یی كو پارته‌كا توند یا نه‌ته‌وه‌په‌ر‌سته د هه‌لبژارتنێن سه‌رۆك كۆماریێ دا شیا رێژه‌یه‌كا گه‌له‌ك باش ده‌نگان بده‌ستڤه بینیت و د 24 نیسانا ئه‌ڤساله دا بۆ قۆناغا دویێ یا هه‌لبژارتنێن سه‌رۆك كۆماریێ ل هه‌مبه‌ر ماكرۆنی دێ هه‌ڤڕكیێ بۆ وه‌رگرتنا پۆستێ سه‌رۆك كۆماریێ كه‌ت. ئیمانوێل ماكرۆن د قۆناغا یه‌كه‌م یا هه‌لبژارتنێن سه‌رۆك كۆماریا فره‌نسا دا شیا نێزیكی 29% ده‌نگان ب ده‌ستڤه بینیت.
چاڤدێرێن سیاسی دیار دكه‌ن كو شانسێ ماكرۆنی گه‌له‌كه دا جاره‌كا دی ببیته سه‌رۆك كۆمارێ فره‌نسا لێ د هه‌مان ده‌می دا زێده‌بوونا ده‌نگێن پارتیێن نهتهوهپهرست ل فره‌نسا و وه‌لاتێن ئێكه‌تیا ئۆرۆپا مه‌ترسیه‌كا گه‌له‌ك مه‌زن بۆ دیموكراسیێ دروست دكه‌ت.
