نازدار جزیری دێ پشكداریێ د كۆنسێرتا كه‌رنه‌ڤالێ رۆژا پارێزگه‌هبوونا دهۆكێ دا كه‌ت
ئه‌ڤرۆ، كاوین جیهاد ته‌حلاڤی:
هونه‌رمه‌ندا كورد نازدار جزیری كو نوكه ب مه‌ره‌ما ئه‌ننجامدانا كۆنسێرته‌كێ ل باژێڕێ دهۆكێ یه د دیداره‌كێ دا بۆ رۆژناما ئه‌ڤرۆ ئاشكرا كر كو ئه‌و كێم سه‌ره‌دانا پارێزگه‌ها دهۆكێ دكه‌ت، ژ به‌ركو كارێن هونه‌ری ب تایبه‌تی كۆنسێرتێن ل دووڤ حه‌زا وێ وه‌كو پێدڤی ل پارێزگه‌ها دهۆكێ ناهێنه گێڕان، به‌لێ د رۆژێن بۆری دا وێ سه‌ره‌دانا باژێڕێ دهۆكێ كریه ب مه‌ره‌ما پشكداریكرنێ د كۆنسێرته‌كێ دا.
ناڤهاتیێ ئاماژه دا وێ چه‌ندێ كو د جه‌ژنا ره‌مه‌زانا پیرۆز دا وێ‌َ وێ ڤیدیۆ كلیپه‌كا خوه یا ب ناڤێ (شادی و شایی) به‌لاڤ كربوو، چه‌ندین به‌رهه‌مێن دی ژی یێن گه‌له‌ك باش د رێ دانه و پێنج هه‌تا شه‌ش سترانێن نوو ئاماده‌كرینه و گۆت: “ئه‌ز دێ ب هه‌لكه‌فتا ٥٣ێ سالیا رۆژا پارێزگه‌هبوونا دهۆكێ كو د كه‌ڤیته رۆژا ئه‌ینیا بهێت 27/5/2022 پشكداریێ د كۆنسێرته‌كێ دا كه‌م و دێ چه‌ندین سترانێن نوو و یێن كه‌ڤن ژی بێژم”.
د پرساره‌كا مه دا كو ئه‌رێ ده‌م نه هاتیه تو و هه‌ڤژینێ خوه یێ سترانبێژ، رابین سترانه‌كێ پێكڤه بێژن، نازدارێ دیار كر كو پرۆژه و به‌رهه‌مێن وان بۆ پاشه‌رۆژێ هه‌نه و دێ ستران و به‌رهه‌مێن گه‌له‌ك جوان و خوه‌ش هه‌بن.
