دسال رۆژا وه‌غه‌ركرنا هونه‌رمه‌ند (ته‌حسین ته‌ها)ی دا مالباتا وی چو داخوازی هه‌نه؟
ئه‌ڤرۆ، هه‌رهین محه‌مه‌د:
ل ٢٨ گۆلانێ سالڤه‌گه‌را هه‌ردو هونه‌رمه‌ندیێن كورده ته‌حسین ته‌ها و عه‌بدوللا زێرین و دڤێ رۆژێ دا سالا نه ئه‌ڤ رۆژی دهێته ساخكرن به‌حس ل ژیان و هونه‌ری َوان دهێته‌كرن و سترانێن وان ژی دبێژن و هه‌ردیسان حه‌زژێكه‌رێن وان ب به‌لاڤكرنا ستران و وێنه و كورتیه‌ك ل سه‌ر ژیانا وان دسوشیال میدیایێ دا به‌لاڤ دكه‌ن و ڤێ رۆژێ ساخ دكه‌ن.
وارڤان ته‌حسین ته‌ها، كورێ هونه‌رمه‌ندێ نه‌مر ته‌حسین ته‌ها د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ گۆت: هه‌تا نوكه ئه‌م وه‌كو مالباتا هونه‌رمه‌ند ته‌حسین ته‌هایی نه دلخوشین ب وێ پاركا ب ناڤێ بابێ مه هاتیه دانان، چونكو هه‌تا نوكه پارك یا بێ ناڤه و ب فه‌رمی نه پاركا ته‌حسین تاهایی یه، ژبه‌رڤێ چه‌ندێ من سه‌ره‌دانا رێڤه‌به‌ریا گه‌شت و گوزار كرو من پرسیاركریه و ب ره‌سمی هێشتا ناڤ نه‌دانایه سه‌ر ڤێ پاركێ و هه‌رگاڤه‌كا پێدڤی بۆ، یان جاده كه‌فته به‌ر، یان بۆ هه‌ركاره‌كێ دی دشێن راكه‌ن، چونكو هه‌تا نوكه یا بێ ناڤه و ب ره‌سمی ناڤ نه‌دانایه سه‌ر وه‌كو یا هونه‌رمه‌ند دلشاد محه‌مه‌د سه‌عید، به‌لێ خه‌لكی ناڤێ وێ كریه پاركا ته‌حسین ته‌های .
زێده‌تر گۆتژی: مه گه‌له‌ك پێخوه‌ش بوو ئه‌و په‌یكه‌رێ نوكه ل ئامێدیێ بۆ بابێ من هاتیه دانان هاتبا راكرن و په‌یكه‌ره‌كێ جوانتر بۆ بابێ من هاتبا دانان، چونكو دوست و هه‌ڤال و حه‌زژێكه‌رێن وی ژ ڤی په‌یكه‌ری نه درازی نه هه‌تا كو ئه‌م ژێ درازی بین و گه‌له‌ك جاران چوویمه جهێن په‌یوه‌ندی دار و من بزاڤكریه وی په‌یكه‌ری بگوهورن و هه‌كه نه‌گورن ژی بلا راكه‌ن، چونكو ب چو ره‌نگان سیمایێ وی وه‌كو بابێ من نینه. وارڤانی ئه‌و چه‌نده‌ژی گۆت: هه‌تا نوكه مه ده‌ستویری نه‌دایه چ سترانبێژن سترانێن بابێ مه نوی بكه‌ت و ئه‌م وه‌كو كور و خێزانا وی مافێ مه‌یه ئه‌م هونه‌رێ وی پارێزین و خوه لێ بكه‌ینه خودان و ده‌نگێ بابێ من هه‌ریێ خوه‌شه و هێشتا وه‌ل ده‌نگێ وی نه هاتیه مرۆڤ دپه‌یڤان نه‌گه‌هین هه‌تا كو سترانێن وی بهێنه نویكرن و گه‌له‌ك سترانبێژ باكوور هه‌نه ده‌مێ سترانان نوی دكه‌ن ده‌ستكاریێ د په‌یڤ و ریتما سترانێ دا دكه‌ن، له‌ورا مه دسوشیال میدیایێ دا به‌لاڤكریه كو ب چ ره‌نگان ده‌ستویریێ ناده‌ین سترانێن بابێ مه بهێنه نویكرن و گه‌له‌ك كه‌س وه‌سا هزردكه‌ن ئه‌م ڤێ چه‌ندێ بۆ هنده‌ك مه‌ره‌مێن تایبه‌ت دكه‌ین و به‌روڤاژی مه چو مه‌ره‌مێن تایبه‌ت ب ڤێ چه‌ندێ نینن و بتنێ مه دڤێت ب جوانی به‌رهه‌م و سترانێن بابێ خوه ب پارێزین وه‌كو ملكێ وی و ل ڤێ دووماهیێ ژی گه‌له‌ك سترانبێژان بێ رازیبوونا مه سترانێن بابێ من نویكریه و هه‌رماندیه و ب ڤێ چه‌ندێ ژی ئه‌م نه درازینه و حه‌زژێكه‌رێن وی ب خوه ته‌له‌فونا من دكه‌ن و نه‌رازیبوونا خوه دیاردكه‌ن ل سه‌ر ڤێ چه‌ندێ. هونه‌رمه‌ند ته‌حسین ته‌ها ل سالا ١٩٤١ ل گوندێ بێبو هاتیه سه‌ر دونیایێ و هه‌رژ زاروكینی حه‌زا هونه‌ری دناخێ وی دا هه‌بوو ل سالا ١٩٦٣كولیژا ونه‌رێن جوان پشكا شانویێ ل به‌غدا ب دووماهیی ئینایه و دبیته ماموستایێ هونه‌ری و پتری سه‌د و بیست ستران و سرۆد توماركرینه و ستایلێ خۆه یێ تایبه‌ت هه‌بوویه دناڤ مه‌یدانا سترانا كوردی دا و خزمه‌ته‌كا شوره‌شێ و كوردایه‌تیێ كریه و ل ٢٨ گولانا سالا ١٩٩٥ ل وه‌لاتێ ئه‌لمانیا وه‌غه‌را دووماهیێ دكه‌ت. هه‌ردیسان هونه‌رمه‌ند عه‌بدوللا زێرین ناڤێ وی یێ دروست (عه‌بدووللا ئیبراهیم ئه‌حمه‌د) كو ب عه‌بدوللا زێرین به‌رنیاسه و ل رێكه‌فتی ١/٧/١٩٥٦ ژدایك بوویه و پتری ١٠٠ سترانان توماركرینه ل ئێزگێ كوردی ل به‌غدا و ل گه‌ل گه‌له‌ك سترانبێژان ژی سترانێن دوقولی گۆتینه و شارازایه‌كا باش ژی د وارێ موزیكێ دا هه‌بوویه و ل رۆژا ٢٨ گولانا سالا ٢٠١١وه‌غه‌را دووماهیێ دكه‌ت.
