ئیران ل دژی ئۆپه‌راسیۆنێن توركیا یه
ئه‌ڤرۆ:
په‌یڤدارێ وه‌زاره‌تا ده‌رڤه یا ئیرانێ دوهی راگه‌هاند كو ئه‌و ل دژی ئۆپه‌راسیۆنێن توركیا ل ئیراقێ و سووریێ نه، چونكو توركیا ب ئۆپه‌راسیۆنێن سه‌ربازی ئالۆزیان ل هه‌ر دو وه‌لاتان دروست دكه‌ت و توركیا رێزێ ل سه‌روه‌ریا ئاخا سووریێ و ئیراقێ ناگریت و ئه‌و یه‌ك ژی ب چو ره‌نگه‌كێ ناهێت قه‌بوولكرن، دڤێت توركیا رێزێ ل قانوونێن نێڤده‌وله‌تی بگریت و ئاخا سووریێ و ئیراقێ داگیر نه‌كه‌ت، چونكو بزاڤێن نها یێن توركیا ب ته‌مامی دهێنه رامانا داگیركه‌ریێ و دڤێت جڤاكێ نێڤده‌وله‌تی ژی ل هه‌مبه‌ر بزاڤێن تێكده‌رانه یێن توركیا بێده‌نگ نه‌مینیت.
سه‌عید خه‌تیب زاده ئه‌و یه‌ك ژی دیار كر كو توركیا و هه‌موو وه‌لاتێن دی باش دزانن كو ب داگیركه‌ریێ و شه‌ری چو پرسه‌ك ناهێته چاره‌سه‌ركرن و دڤێت توركیا ژی ده‌ستان ژ ئۆپه‌راسیۆنێن خوه ل ئاخا ئیراقێ و سووریێ به‌رده‌ت و بزاڤێ بكه‌ت ب رێیێن سیاسی پرسێن هه‌ی چاره‌سه‌ر بكه‌ت و گۆت: (توركیا به‌حسێ مه‌ترسیێن ل سه‌ر ئاسایشا خوه دكه‌ت، ره‌نگه توركیا د هنده‌ك خالان دا مافدار بیت، لێ ئه‌و یه‌ك رامانا هندێ ناده‌ت كو توركیا ب رێیا ئۆپه‌راسیۆنێن سه‌ربازی قانوونێن نێڤده‌وله‌تی بنپێ بكه‌ت و ئاخا سووریێ و ئیراقێ داگیر بكه‌ت، ئه‌و یه‌ك ب چو ره‌نگه‌كێ ناهێته قه‌بوولكرن).
