دیدارا (ته‌حسین تاهای) ئه‌ڤرۆ ل دهۆكێ دێ هێته گێڕان
دهۆك، زنار تۆڤی:
ب پشته‌ڤانیا رێڤه‌به‌ریا گشتی یا ره‌وشه‌نبیری و هونه‌ری ل پارێزگه‌ها دهۆكێ، گرۆپێ فه‌له‌ك یێ ره‌وشه‌نبیری و جڤاكی، ل به‌ره ئه‌ڤرۆ ئێڤاری روونشتنه‌كا تایبه‌ت ل بن ناڤێ (دیدارا ته‌حسین تاهای، ژ پێشه‌نگێن سترانا كوردی یا هه‌ڤچه‌رخ) بگێڕیت.
حه‌سه‌ن فه‌تاح، په‌یڤدارێ رێڤه‌به‌ریا گشتی یا ره‌وشه‌نبیری و هونه‌ری ل پارێزگه‌ها دهۆكێ، ل دۆر به‌رنامێ ڤێ دیدارێ بۆ رۆژناما ئه‌ڤرۆ گۆت: دڤێ دیدارێ دا دێ هژماره‌كا بیرهاتن و هه‌لویستێن نه‌ته‌وه‌ی و نیشتیمان په‌روه‌ری یێن هونه‌رمه‌ندێ مه‌زن ته‌حسین تاهای هێنه به‌حسكرن، هه‌روه‌سا چه‌ند سترانێن وی هێنه گۆتن و دێ به‌حسێ چاوانیا هه‌لبژارتنا وی بۆ په‌یڤ و ئاوازێن سترانێن وی هێته كرن، و هژماره‌كا هونه‌رمه‌ند و نڤیسكار و رۆژنامه‌ڤان و ره‌وشه‌نبیر و هه‌ڤالێن هونه‌رمه‌ند ته‌حسین تاهای دێ ل ڤێ دبدارێ پشكداربن كو دێ ل ده‌مژمێر شه‌شی ئێڤاری ل كافتریا پیرۆمه‌را ل گوندێ پیرۆمه‌را هێته گێڕان.
هونه‌رمه‌ند ته‌حسین تاها، ل سالا 1941 ژدایكبوویه، ل بیست و حه‌فتی خزیرانا سالا 1995 ژ ئه‌نجامێ نه‌خوشیه‌كێ ل ده‌رڤه‌ی وه‌لاتی وه‌غه‌را دووماهیێ كریه و پشتی چه‌ند رۆژان ته‌رمێ وی گه‌هشته كوردستانێ و ل گۆرستانا باژێرێ ئامێدیێ هاتیه ڤه‌شارتن.
