كورته فلمه‌كێ كوردی چیرۆكا پێشمه‌رگه‌كی ڤه‌دگه‌ڕیت
ئه‌ڤرۆ:
هه‌وره‌بان، كورته فلمه‌كێ كوردیه و به‌حسێ پێشمه‌رگه‌كی دكه‌ت كو ژ لایێ رژێما به‌عسا ژناڤچووی ڤه دهێته ده‌سته‌سه‌ركرن و چو دانپێدانان ناكه‌ت و دووڤ دا دهێته رزگاركرنو به‌رده‌وامیێ دده‌ته خه‌باتا خوه.
گۆران سه‌رگه‌لۆیی، ده‌رهێنه‌ر و نڤیسه‌رێ سیناریۆیا كورته فلمێ هه‌وره‌بان دیار كر كو قووناغا وێنه‌گرتنا كورته فلمێ هه‌وره‌بان ب شێوه‌یه‌كێ سه‌ركه‌فتیانه ب دووماهی هاتیه و ژ لایێ كۆمپانیا (پی ئۆ ڤی) ڤه هاتیه به‌رهه‌مئینان، هه‌روه‌سا كۆمپانیا (سینه‌كورد) ژی بجهئینانێ دا پشكداربوویه و بۆ كوردستان تیڤی گۆت: “ئه‌ڤ كورته فلمه ل سنوورێ پارێزگه‌ها سلێمانیێ هاتیه وێنه‌كرن و ستافێ كورته فلمی ژی خه‌لكێ هه‌مان پارێزگه‌ه بوون و بڕیاره ل ده‌مه‌كێ نێزیك پۆسته‌رێ فلمی بهێته به‌لاڤكرن”.
چیرۆكا كورته فلمی ژ لایێ رومانڤیس (نه‌به‌رد فۆئاد)ی ڤه هاتیه نڤیسین و (به‌ختیار عه‌بدولره‌حمان)ی ژی وه‌كو هاریكارێ ده‌رهێنه‌ری كاركریه و (محمه‌د شێروانی) ژی وه‌كو وێنه‌گر پشكداربوویه، د ڤی به‌رهه‌می دا ژماره‌كا ئه‌كته‌ران ژی پشكداربووینه ژوان (جه‌زا حه‌مه سه‌عید) و (مه‌ریوان كه‌ریم) و (ماهر ستار).
