عه‌دنان سالح: ره‌وشا من یا ساخله‌میێ كارتێكرن ل هونه‌رێ من كریه
ئه‌ڤرۆ، رێوار محه‌مه‌د ره‌شید:
هونه‌رمه‌ند عه‌دنان سالح د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ ئاشكرا كر كو ره‌وشا وی یا ساخله‌میێ هه‌تا راده‌یه‌كی یا باش نینه و نوكه به‌رده‌وام چاره‌سه‌ریێ ل وه‌لاتێ توركیا وه‌ردگریت ئه‌ڤه د ده‌مه‌كی دایه كو به‌ری شه‌ش سالان ژی وی دو تۆرێن دلی دانابوون و گۆت: “لایه‌نێن په‌یوه‌ندیدار خوه ل من كریه خودان و مه‌زاختیێن چاره‌سه‌ریا من ب ستویێ خوه‌ڤه گرتینه”.
ناڤهاتی ئاماژه دا وێ چه‌ندێ كو بۆ ده‌مه‌كێ درێژه سترانه‌كا نوو ل به‌ر ده‌ستێ وی هه‌یه بناڤێ (فه‌لسه‌فا ژیانێ) كو ژ په‌یڤێن (هه‌ڤال زاخۆیی) و ئاوازێن هونه‌رمه‌ند (سه‌میر زاخۆیی) یه و ژ به‌ر نه‌بوونا سپۆنسه‌ران د شیانێن وی دا نه‌بوو تۆمار بكه‌ت، به‌لێ نوكه سپۆنسه‌ره‌كی به‌رهه‌ڤیا خوه بۆ تۆماركرن و كلیپكرنا ڤێ سترانێ دیاركریه و ل ده‌مه‌كێ نێزیك دێ كار د تۆماركرنا وێ سترانێ دا كه‌ت و گۆت: “ره‌وشا من یا ساخله‌میێ كارتێكرن ل هونه‌رێ من كریه، به‌لێ من ده‌ست ژ هونه‌ری به‌رنه‌داینه و ئه‌ز یێ به‌رده‌وامم ل سه‌ر كارێ خوه یێ هونه‌ری”.
