4 كچ رادیۆیه‌كێ ل هه‌ولێرێ ب رێڤه‌دبه‌ن
هه‌ولێر، شاكر ئه‌تروشی:
رادیۆیا هێلین، كو سه‌ر ب ئێكه‌تیا ئافره‌تێن كوردستانێ ڤه‌یه، دناڤ دو ژۆرێن بچووكڤه ل ئاڤاهیێ مه‌كته‌با سكرتاریه‌تا ئافره‌تان ل هه‌ولێرا پایته‌خت، ژلایێ چار كچێن گه‌نجڤه دهێته ب رێڤه‌برن و نوكه به‌خشێ وێ دگه‌هیته پرانیا باژێرێن كوردستانێ و ب گۆتنا رێڤه‌به‌را رادیۆیێ وان پلانه‌ك دانایه بۆ به‌رفره‌هكرنا به‌خشێ رادیۆیێ، هه‌روه‌سا زێده‌كرنا ستافێ كاری و ل گۆڕه‌ی شیانان دێ پلانا خوه بجه ئینن.
شه‌یما مسته‌فا، ئه‌نداما مه‌كته‌با سكرتاریه‌تا ئافره‌تان، كو د هه‌مان ده‌مدا رێڤه‌به‌را وێ رادیۆیێ یه، د دیداره‌كێ دا بۆ رۆژناما ئه‌ڤرۆ گۆت: رادیۆیا هێلین كو ده‌نگ و ره‌نگێ هه‌موو ئافره‌تێن كوردستانێ یه، ل سالا 2013 هاتیه ڤه‌كرن، نوكه بتنێ سێ كچ ب رێڤه‌دبه‌ن ئه‌و ژی (دالیا، ئانیا، تانیا) كو هه‌ر سێ ژ هه‌ولێرێ نه و ل گه‌ل من دبنه چار، مه (48) به‌رنامه هه‌نه كو هه‌موو بۆارێن ژیانێ ب خوه دگرن هه‌نه، ژوانا هنده‌ك به‌رنامه گرێدای ئاڤاكرنا شیانێن ئافره‌تانه و به‌رنامێن یاسایی، هنده‌ك ژوان به‌رناما بۆمه ژده‌رڤه دهێنه ئاماده‌كرن و پێشكێشكرن، هنده‌كان ژی ئه‌و هه‌رسێ كچ ئاماده و پێشكێش دكه‌ن، هه‌روه‌سا كارێ ده‌رهێنه‌ریێ ژی دكه‌ین، مه ل به‌ره كچه‌كێ یان پتر بینین بۆ به‌رنامێن كرمانجی، هه‌روه‌سا دپلانا مه‌دایه مه تۆڕه‌كا په‌یامنێران هه‌بیت كو سه‌رتاسه‌ری كوردستنانێ و ژده‌رڤه ب خوه ڤه‌بگریت، لێ وه‌كو مه گۆتی ئه‌م دێ ل دووف شیانان رادیۆیا خوه پێشڤه به‌ین.
هه‌روه‌سا بۆ وه‌رزێ بهێت ژی دێ مه زێده‌تر به‌رنامه هه‌بن، ژوانا به‌رنامه‌كێ ده‌روناسی ب ناڤێ (باوه‌ری ب خوه بوون) هه‌بیت ئه‌ڤ به‌رنامه دێ ژلایێ كه‌سه‌كێ بسپۆرڤه هێته ئاماده‌كرن و پێشكێشكرن، كو ناما ماسته‌رێ دوی بۆاری دا هه‌یه، زێده‌باری چه‌ند به‌رنامێن دی و ئه‌م دگه‌شبینین ب پشته‌ڤانیا (د. ڤیان سلێمان) سكرتێرا ئێكه‌تیا ئافره‌تێن كوردستانێ شیێن رۆژ بۆ رۆژێ رادیۆیا هێلین به‌ر ب پێشڤه ببه‌ین، دا ب كریار ببیته ده‌نگێ هه‌موو ئافره‌تێن كوردستانێ.
