پێدڤیه هه‌ر ئێكی ژ مه چه‌ندین فلمه ڤیدیۆ هه‌بن
دهۆك، شاكر ئه‌تروشی:
وێنه‌گر و مۆنتێر (ژۆری بامه‌رنی) د دیداره‌كێ دا بۆ رۆژناما ئه‌ڤرۆ گۆت: كارێ من یێ سه‌ره‌كی، ئه‌ز ڤیدیۆیان مونتاژ دكه‌م و كلیپان بۆ بووك و زاڤا چێدكه‌م، هه‌روه‌سا ئاهه‌نگێن بچووك ژی وه‌ك (رۆژ بوونان، ئاهه‌نگێن ده‌رچوونێ، مێهڤانداری و هه‌لكه‌فتان) وێنه‌دكه‌م و مونتاژ ژی دكه‌م.
ژۆری گۆت: د ژیانا هه‌ر ئێك ژمه‌دا رۆژێن خۆش و هه‌لكه‌فتێن جوان هه‌نه، لێ ده‌مێ ئه‌م بیرا خوه لێ دئینین، بتنێ وه‌ك سیتافكه‌كێ ل به‌ر چاڤێن مه‌را ده‌رباز دبن، لێ هه‌كه ئه‌م وان هه‌لكه‌فتان بكه‌ینه فلمه ڤیدیۆ، ل وی ده‌می ئه‌و دێ بنه پشكه‌كا زیندی ژ ژیانامه و هه‌رده‌مێ مرۆڤی حه‌زكر، دێ شێت ل وان بیره‌وه‌رییان زڤریت و دڤێت هه‌ر ئێكی ژمه چه‌ندین فلمه ڤیدیۆیێن هوسا د مالێن خوه دا هه‌بن، ژبه‌ركو هه‌موو تشت دبۆرن و به‌رزه دبن، بتنێ ئه‌ڤه دمینن، بینه بیرا خوه ژی ده‌مێ فلمه ڤیدیۆیا ساخكرنا جه‌ژنا بوونا زارۆكێ مه به‌ری زێده‌تر ژ ده‌هـ سالان وه‌ك نموونه ل ده‌ف مه هه‌بیت و ده‌مێ ئه‌م ئه‌ڤرۆ بینه‌ریا وی فلمه ڤیدیوێ دكه‌ین، دێ چه‌ند گوهۆرین هه‌بن، ژ شێوازێ جلكان و ئه‌و كه‌سایه‌تیێن د ڤیدیۆێ دا ده‌ركه‌فتین، ل وی ده‌می بتنێ مرۆڤ دێ بهایێ وان زانیت، كو ب چ پاره‌ی ناهێنه كرینێ.
