چل سالن ل تازیان غه‌ریبۆكان دبێژیت
سێمێل، دلڤین ره‌شید:
دای به‌سێ مراد حسێن، خه‌لكا گوندێ سیبا شێخدرایه، سه‌ر ب قه‌زا شنگالێ ڤه، ژیێ وێ شێست سالن، ب گۆتنا وێ نێزیكی چل سالانه ئه‌و غه‌ریبۆكان دناڤ تازیاندا دبێژیت و ئه‌ڤ كاره ژ داپیرا خوه گرتیه.
نافهاتیێ بۆ رۆژناما ئه‌ڤرۆ گۆت: ده‌ستپێكا من ل گه‌ل ڤی كاری یا ب زه‌حه‌مه‌ت بوو، چونكو ل وی سه‌رده‌می شه‌رم بوو ژن ستران و غه‌ریبۆكان بێژن، به‌لێ مه ئه‌و سنورێن شه‌رمێ شكاند و نوكه ئه‌ڤ كاره بوویه ده‌رگه‌هێ رزقێ من و خه‌لك ل ده‌مێ تازیان من داخواز دكه‌ن ئه‌ز دچم بۆ وان غه‌ریبۆكان دبێژم ئه‌وژی ب خێرا مری/مریێ، هنده‌ك پاره‌ی دده‌نه من، بۆ زانین مرنا برایێ من كارتێكرن ل من كر ئه‌ز غه‌ریبۆكان بێژم، به‌لێ ل وی ده‌می بتنێ من بۆ خوه دگۆتن، چونكی ئه‌و ل سه‌رده‌ستێ رژێمێ هاتبوو كوشتن، ژ وی ده‌می و هه‌تا نوكه و پشتی جینۆسایدا ب سه‌رێ مه هاتی ئه‌ز به‌رده‌وام دناڤ كه‌مپاندا غه‌ریبۆكان بۆ خه‌لكێ دبێژم، چنكو ده‌ردێ دلێ من گه‌له‌كێ گرانه.
