ئه‌سفه‌ندیار ئه‌حمه‌د: من دڤێت ببمه سترانبێژه‌كا به‌رنیاس نه پێشكێشكار
دهۆك، شاكر ئه‌تروشی:
سترانبێژ و پێشكێشكار (ئه‌سفه‌ندیار ئه‌حمه‌د) د دیداره‌كێ بۆ رۆژناما ئه‌ڤرۆ گۆت: ده‌مێ ئه‌ز هاتیمه د ناڤ بۆارێ هونه‌ری دا من ب سترانگۆتنێ ده‌ستپێكر، چنكو باب و باپیر و برایه‌كێ من ستران دگۆتن، به‌لێ نوكه ئه‌و برایێ من مۆزیكژه‌نه، له‌ورا ئه‌ز یا خوه به‌رهه‌ڤ دكه‌م دا سترانه‌كێ تۆماربكه‌م و ئه‌و هه‌لبه‌ستڤان و ئاواز دانه‌رێن ئه‌ز ل گه‌ل ئاخفتیم به‌رهه‌ڤیا خوه بۆ من دیاركرینه كو سترانا بۆ من چێكه‌ن، لێ ئه‌م پێدڤی ب سپۆنسه‌ره‌كی نه، و ل هه‌كه سۆپنسه‌ر هه‌بوون دێ كلیپه‌كێ ژی چێكه‌م، ده‌رباره‌ی ئه‌لبۆمه‌كا سترانان ژی ئه‌ز دبێژم هێشتا ئه‌و زوویه، بۆ زانین به‌ری چه‌نده‌كێ من سترانه‌كا هونه‌رمه‌ند مه‌حوود بامه‌رنی گۆت و ل یۆتیۆپێ خوه به‌لاڤكر، هه‌روه‌سا سترانه‌كا هونه‌رمه‌ند عارف چۆپانی ژی تۆماركریه ل نێزیك دێ وێ ژی به‌لاڤكه‌م.
ده‌رباره‌ی به‌رنامێ خوه (دهۆك شۆ) كو بۆ ده‌مه‌كی ل كه‌نالێ دهۆك تیڤی پێشكێش دكر، گۆت: ده‌مێ مه ده‌ست ب وی به‌رنامی كری پلان وه‌سا بوو كو بتنێ دوازده خه‌له‌كان تۆمار بكه‌ین، لێ یێ به‌رده‌وام بوو بۆ ده‌مێ ساله‌ك و چار هه‌یڤان و نوكه ژی ئه‌ز یا به‌رهه‌ڤم بۆ هه‌ر به‌رنامه‌كێ دی ب مه‌رجه‌كی هونه‌ری هه‌مه‌ره‌نگ بیت، بۆ پاشه‌رۆژێ ژی چو پێ نه‌ڤێت من دڤێت ببمه سترانبێژه‌كا به‌رنیاس، نه پێشكێشكار، چنكو وه‌كو من دیاركری ئه‌ز ژمالباته‌كا هونه‌ری مه.
