بێتاسی دێ كورته فلمه‌كێ نوو به‌رهه‌م ئینیت
دهۆك، زنار تۆڤی:
ده‌رهێنه‌ر (كامیران بێتاسی) د دیداره‌كێ دا بۆ رۆژناما ئه‌ڤرۆ دیاركر كو ئه‌ڤه ده‌مه‌كه ئه‌و مژوولی چێكرنا كورته فلمه‌كی یه، ده‌مێ وی دوازده خوله‌كن، ل باژێرێ زاخۆ هاتیه وێنه‌كرن، ل نێزیك دێ ب دووماهی هێت و دێ پشكداریێ د فلمه فیسته‌ڤالا دهۆكێ یا نێڤده‌وله‌تی دا كه‌ت.
ناڤهاتی گۆت: ناڤه‌رۆكا وی كورته فلمی ل دۆر ماله‌كا هه‌ژاره، كو دو زارۆك گولان ل ناڤ گۆرستانێ دفرۆشن و زه‌لامه‌ك ژی زێره‌ڤانێ گۆرستانێ یه و كارێ وی ژی كارێ سندریكایه و چیرۆكا كورته فلمی د ناڤبه‌را وان زارۆیان و وی زێره‌ڤانی دایه و هه‌ردو هه‌ڤڕكیێ بۆ ژیانێ و په‌یداكرنا نانی دكه‌ن، فلم ژ نڤێسین و ده‌رهێنانا منه، سامان مسته‌فای د سیناریۆیێ دا كاركریه، هه‌روه‌سا گۆهدار شێخۆیی، سه‌رپه‌رشتێ ئیدارا سه‌ربه‌خۆ یا زاخۆ، پشته‌ڤانا دارایی ل كورته فلمی كریه و ده‌مێ ب دووماهی دهێت دێ پشكداریێ د فلمه فیسته‌ڤالا دهۆكێ دا كه‌ت، چونكی مه ئه‌و فلمه فیسته‌ڤاله یا هه‌یی، هه‌روه‌سا هه‌تا نوكه مه چ ناڤ نه‌داناینه سه‌ر وی كورته فلمی، هه‌ر چه‌نده به‌ری نوكه من ناڤێ وی كربوو (ژۆرا بچووك) به‌لێ ب زمانێ ئینگلیزی فلمه‌كێ دی ب وی ناڤی هه‌یه، له‌وما ل نێزیك دێ ناڤه‌كێ دی بۆ هێته دانان.
