حه‌ز دكه‌ت پشكداریێ د فلمێن سینه‌مایی دا بكه‌ت
دهۆك، زنار تۆڤی:
سترانبێژ و شانۆڤان و مۆزیكژه‌ن، چیچه‌ك ته‌كده‌میر، كو ب (كولیلكا حه‌سكیفێ) دهێته نیاسین، د دیداره‌كێ دا بۆ رۆژناما ئه‌ڤرۆ دیار كر كو ئه‌ڤه چه‌ندین سالن ئه‌و د وارێ هونه‌ری دا كار دكه‌ت و هه‌تا نوكه پشكداری د چه‌ندین شانۆگه‌ریان دا كریه، هه‌روه‌سا سترانان ژی دبێژیت و ده‌فێ و سازێ دژه‌نیت، دیسان وێ پشكداری د چه‌ندین كورته فلمان و فلمه‌كێ درێژ ژی دا كریه و داخواز ژێ هاتیه‌كرن كو پشكداریێ د فلمێن سینه‌مایی دا بكه‌ت، لێ هه‌تا نوكه ده‌لیڤه بۆ په‌یدا نه‌بوویه و چه‌ندین سالان كارێ پێشكێشكاریێ ل چه‌ندین ته‌له‌فزیۆنان ل باكورێ كوردستانێ كریه.
ناڤهاتیێ گۆت: من سترانه‌كا نوو ب ناڤێ (دلێ من) چێكریه، ژ په‌یڤ و ئاوازێن هۆزان دلگه‌شی نه، فه‌رهاد ئه‌مه‌ن ب كارێ وێنه‌كرنا وێ كلیپێ رابوویه، هه‌ر چه‌نده ئه‌ز سترانان دبێژم به‌لێ پتر حه‌ز ژ كارێ ئه‌كته‌ریێ دكه‌م و هیڤیا من ئه‌وه پشكداریێ د فلمێن سینه‌مایی یێن كوردی دا بكه‌م، و گه‌له‌ك حه‌ز ژ ده‌نگێ هونه‌رمه‌ندێ نه‌مر محه‌مه‌د شێخۆیی دكه‌م.
