هیڤیا دو برا ئه‌وه كه‌ناله‌كێ ته‌له‌فزیۆنی ڤه‌كه‌ن
دهۆك، شاكر ئه‌تروشی:
لوقمان و ره‌یان، دو برایێن ئێكن، ئاكنجیێن دهۆكێ نه، به‌ری دوسالان ل مالا خوه په‌یجه‌ك ب ناڤێ (كۆرال مۆزیك) ڤه‌كرینه، هه‌تا نوكه پتری (42) هزارا بینه‌ران هه‌نه و حه‌زا هه‌ردو برا ئه‌وه ل پاشه‌رۆَژێ په‌یجێ وان ببیته كه‌ناله‌كێ ته‌له‌فزیۆنی، لێ گۆتنا وان ژبه‌ر نه‌بوونا پشته‌ڤانیێ ڤه‌كرنا وی كه‌نالی گه‌له‌ك ب زه‌حمه‌ت دبینن.
برایێ مه‌زن (لوقمان مسته‌فا) د دیداره‌كێ دا بۆ رۆژناما ئه‌ڤرۆ گۆت: هزرا ڤه‌كرنا ڤی په‌یجی یا برایێ من یێ سترانبێژ (شڤان مسته‌فا) ی بوو، لێ ئه‌ز و ره‌یان ب كارێ ب رێڤه‌برنا وی رادبین، هه‌تا نوكه پتری دو هزار سترانان، كو 80% یێن ده‌نگێن ره‌سه‌نن و 20% یێن سترانبێژێن نۆخازن مه‌كرینه د په‌یجی دا، هژمارا بینه‌ران ژ (42) هزار كه‌سان ده‌ربازبووینه، هه‌روه‌سا مه فه‌یسبووك و ئه‌كاوه‌نت ژی هه‌نه، مه‌ره‌ما مه ژڤی په‌یجی ئه‌وه دا سترانێن نه‌مر و ره‌سه‌ن ب پارێزین، چنكو مخابن دنوكه دا گه‌له‌ك كه‌نالان ئه‌و ده‌نگێن ره‌سه‌ن ژبیركرینه و سترانێن وان ژی ب هێجه‌تا نه‌بوونا كوالتیه‌كا باش به‌لاڤ ناكه‌ن، له‌ورا مه خوه لێ كریه خودان دا ئه‌ڤ ده‌نگێن نه‌مر هه‌ر زیندی بمینن، بۆ زانین هه‌موو كارێ مه ل مال و بیێ پشته‌ڤانی دهێته ئه‌نجامدان و ئه‌م حه‌زدكه‌ین رۆژه‌ك بهێت بكه‌ینه كه‌ناله‌كێ ته‌له‌فزیۆنی دا ده‌نگێن ره‌سه‌ن نه‌هێنه ژبیركرن، لێ ب راستی ئه‌م ڤێ چه‌ندێ ب زه‌حمه‌ت ژی دبینین، چنكو چو پشته‌ڤانی نینه، لێ ئه‌م دێ هه‌ر د به‌ردوام بین.
