نێچیرڤان حسێن: هه‌تا نوكه سێ جاران ئه‌ز ژمرنێ رزگار بوویمه
دهۆك، شاكر ئه‌تروشی:
نێچیرڤان حسێن، پێشكێشكار و پرودوسه‌ر ل كه‌نالێ وار تیڤی، د دیداره‌كێ دا بۆ رۆژناما ئه‌ڤرۆ گۆت: ل سالا 2005 ئه‌ز هاتیمه دناڤ بۆارێ راگه‌هاندنێ دا، ده‌ستپێكا من ل كه‌نالێ دهۆك تیڤی بوو، كو ئه‌ز په‌یامنێرێ وه‌رزشی بووم، دووڤدا چوومه كه‌نالێ كوردستان و زاگرۆس یێن عه‌سمانی و ل 2013 چوومه كه‌نالێ رووداو، و 2019 وه‌ره هه‌تا نوكه ل كه‌نالێ وار تیڤی مه و ل هه‌ر كه‌ناله‌كێ من لێ كاركربیت ئه‌ز یێ ئارابوویمه و شانازیێ ب هه‌موو كارێن خوه دكه‌م.
نێچیرڤانی گۆت: ده‌مێ شه‌ڕێ داعش ده‌ستپێكری وه‌ك په‌یامنێره‌كێ چه‌نگی ئه‌ز چوومه سه‌نگه‌رێن پێشمه‌رگه‌ی و رۆژانه من ده‌نگوباسێن پێشمه‌رگه‌ی و سه‌ركه‌فتنێن وان تۆماردكرن، د ماوێ كاركرنێ دا مه‌ترسی ل سه‌ر ژیانا مه هه‌بوو، سێ جاران ئه‌ز ژمرنێ رزگاربوویمه، ژبلی سه‌نگه‌رێن ڤێره ئه‌ز چووبوومه شه‌ڕێ كۆبانێ ژی و پتری هه‌یڤه‌كێ ل وێری بووم، هه‌ر راپۆرت و دیداره‌كا من ل گه‌ل پێشمه‌رگه‌ی كری بۆ من هه‌موو بیرهاتن و یا ژ هه‌موویێ نه‌خۆشتر به‌ری شه‌هیدبوونا پێشمه‌رگێ قه‌هره‌مان شێخ ئه‌حمه‌د ب ده‌ه خوله‌كان ئه‌ز ل ده‌ف وی بووم و پشتی نووچه‌یێ شه‌هیدبوونا وی گه‌هشتیه من ئه‌ز گه‌له‌ك خه‌مباربووم و چو جاران وێ رۆژێ ژبیرناكه‌م.
ل دووماهیێ گۆت: ل گه‌ل هێزا دژه تیرۆرا ئیراقی من پشكداری د شه‌ڕێ (رمادی) ژی دا كربوو، ل وێرێ من راپۆرته‌ك ل سه‌ر (سه و پشیكان) چێكربوو كا چاوا گۆشتێ مرۆڤان دخوار وێ راپۆرتێ گه‌له‌ك ده‌نگڤه‌دا و ل چه‌ندین كه‌نالێن جیهانی دا به‌لاڤ بوو.
