راگه‌هاندنا توركیا:په‌نابه‌رێن سووریی ژ ترسا نه‌ته‌وه‌په‌رستان به‌رێ خوه دده‌نه ئۆرۆپا
ئه‌ڤرۆ:
ده‌زگه‌هێن راگه‌هاندنا توركیا دیار دكه‌ن كو ده‌مه‌كه ئێرشێن نه‌ته‌وه‌په‌رستان ل سه‌ر په‌نابه‌رێن سووری ل توركیا زێده‌تر بووینه و ژ به‌ر هندێ ژی د ناڤ مه‌هه‌كێ دا چه‌ند هزار په‌نابه‌رێن سووریێ به‌رێ خوه داینه ئۆرۆپا و ئه‌و یه‌ك ژی بوویه جهێ دلگرانیا وه‌لاتێن ئۆرۆپی.
ده‌زگه‌هێن راگه‌هاندنا توركیا دیار دكه‌ن كو ده‌مه‌كه ئێرشێن نه‌ته‌وه‌په‌رستان ل سه‌ر په‌نابه‌رێن سووری ل توركیا زێده بووینه و حه‌فتیا بۆری په‌نابه‌ره‌كێ سووری كو قۆنابیێ زانكۆیێ بوو ژ ئالیێ چه‌ند نه‌ته‌وه‌په‌رستان ڤه هاته كوشتن و هه‌روه‌سا ل پڕانیا باژێرێن توركیا درووشم ل دژی په‌نابه‌رێن سووری دهێنه بلند كرن و داخواز ژ وان دهێته كرن كو ژ توركیا ده‌ركه‌ڤن و ژ به‌ر هندێ ژی پێله‌كا نوو یا كۆچبه‌ریا په‌نابه‌رێن سووری به‌ر ب ئۆرۆپا ده‌ستپێكریه.
ده‌زگه‌هێن راگه‌هاندنا توركیا دیار دكه‌ن كو د ناڤ مه‌هه‌كێ دا نێزیكی سێ هزار په‌نابه‌رێن سووری ژ ترسا ئێرشێن نه‌ته‌وه‌په‌رستان به‌رێ خوه داینه ئۆرۆپا و هه‌روه‌سا گه‌له‌ك ژ په‌نابه‌رێن دی ژی به‌رهه‌ڤیان دكه‌ن دا ژ توركیا ده‌ركه‌ڤن و ئه‌و یه‌ك ژی بوویه جهێ دلگرانیا وه‌لاتێن ئێكه‌تیا ئۆرۆپا، چونكی وه‌لاتێن ئێكه‌تیا ئۆرۆپا هه‌تا نها چه‌ندین ملیار یۆرۆ پاره داینه توركیا دا په‌نابه‌رێن سووریێ ل توركیا بمینن و نه‌بنه بارگرانی بۆ ئۆرۆپا لێ نها ژ به‌ر ئێرشێن نه‌ته‌وه‌په‌رستان ره‌وش ب ته‌مامی هاتیه گوهۆرین و ئه‌و یه‌ك ژی بوویه جهێ دلگرانیا وه‌لاتێن ئۆرۆپی.
چاڤدێرێن سیاسی ژی دیار دكه‌ن كو به‌ری نها ئاكپارتیێ بابه‌تێ په‌نابه‌رێن سووریێ بۆ به‌رژه‌وه‌ندیێن خوه بكارئینا و ئه‌ردۆغانی شیا گه‌له‌ك مفایان ژ په‌نابه‌رێن سووریێ وه‌ربگریت و گه‌له‌ك ژ وان هاتنه چه‌كدار كرن و د شه‌رێ ل سووریێ، لیبیا و ئه‌رمه‌نستانێ دا هاتنه كوشتن و نها ژی ره‌وشا سووریێ به‌ر ب گوهۆرینێن مه‌زن ڤه دچیت و توركیا دڤێت په‌یوه‌ندیێن خوه ل گه‌ل سووریێ ئاسایی بكه‌ت، ژ به‌ر هندێ ژی ئێدی پێدڤیا ئاكپارتیێ ب په‌نابه‌رێن سووریێ نه‌مایه و ده‌ستهه‌لاتا توركیا دڤێت ئێدی په‌نابه‌رێن سووریێ ژ توركیا ده‌ركه‌ڤن، ئێرشێن نه‌ته‌وه‌په‌رستان ژی ژ به‌ر هندێ دهێنه كرن و ده‌ستهه‌لاتا توركیا ژی ل هه‌مبه‌ر وان ئێرشان بێده‌نگه، ئه‌و یه‌ك ژی نیشا دده‌ت كو ده‌ستێ ده‌ستهه‌لاتێ بخوه د ئێرشێن ل سه‌ر په‌نابه‌رێن سووریێ دا هه‌یه.
ئه‌و یه‌ك د ده‌مه‌كێ دایه كو هه‌تا نها به‌رپرسێن توركیا ل دۆر ئێرشێن نه‌ته‌وه‌په‌رستان ل سه‌ر په‌نابه‌رێن سووریێ ب فه‌رمی چو داخۆیانیه‌ك نه‌داینه و هه‌روه‌سا پارتێن ئۆپۆزسیۆنا توركیا ژی ل هه‌مبه‌ر وان ئێرشان د بێده‌نگن، رێكخستنێن مافێن مرۆڤی ل توركیا ژی دیار دكه‌ن كو هه‌كه ده‌ستهه‌لات ل هه‌مبه‌ر ئێرشێن ل سه‌ر په‌نابه‌رین سووری بێده‌نگ بیت ئه‌و یه‌ك دێ بیته ئه‌گه‌رێ روودانا كاره‌ساتێن مه‌زن.
