بنگه‌هێ لالش دێ پرتووكێن نڤیسه‌ران چاپكه‌ت
دهۆك، شاكر ئه‌تروشی:
پشتی ده‌ست بكاربوونا ده‌سته‌یا نوو یا بنگه‌هێ لالش یێ ره‌وشه‌نبیری و كومه‌لایه‌تی ل دهۆكێ، بڕیار هاتیه دان ب شێوه‌كێ باشتر پرتووكێن نڤیسه‌ران بهێنه چاپكرن و به‌رپرسێ راگه‌هاندنا بنگه‌هی ژی دیاركر هه‌تا نوكه هژماره‌كا پرتووكان گه‌هشتینه به‌رده‌ستێ وان و ل ده‌مێ بهێت دێ هێنه ره‌وانه‌كرن بۆ چاپخانێ.
كاروان باعه‌دری، به‌رپرسێ پشكا راگه‌هاندنێ ل بنگه‌هێ لالش یێ ره‌وشه‌نبیری و كومه‌لایه‌تی ل دهۆكێ، بۆ رۆژناما ئه‌ڤرۆ گۆت: هه‌ر پرتووكه‌كا دگه‌هیته بنگه‌هی دێ ژلایێ لژنه‌كا بسپۆرڤه هێته هه‌لسه‌نگاندن و هه‌كه بڕیارا لژنێ ئه‌و بوو كو ژهه‌ژی چاپكرنێ یه دێ هێته ره‌وانه‌كرن بۆ چاپخانێ و ئه‌م دێ پرتووكێن ئه‌ده‌بی و بابه‌تێن گرێدای ئێزدیان وه‌رگرین و هیڤیا من ئه‌وه ئه‌م بشیێن هژماره‌كا پرتووكێن باش چاپ بكه‌ین و پرتووكخانا كوردی پتر پێ زه‌نگین بكه‌ین، چنكو هه‌رده‌م درۆشمێ بنگه‌هی ئه‌وه بوویه (لالش كانیه‌كا زه‌لاله دهۆرته رۆبارێ ره‌وشه‌نبیری یا كوردی دا).
