ناڤه‌ندا چاڤدێریا مافێن مرۆڤی:داعش ل سووریێ خوه بۆ كریارێن تیرۆرستی به‌رهه‌ڤ دكه‌ت
ئه‌ڤرۆ:
ناڤه‌ندا چاڤدێریا مافێن مرۆڤی یا سووریێ راگه‌هاند كو رێكخستنا تیرۆرستی یا داعشێ خوه بۆ كریارێن تیرۆرستی ل سووریێ به‌رهه‌ڤ دكه‌ت و به‌ری چه‌ند رۆژان ژی ل دێرازۆرێ داعشێ ئێرشی هێزێن سووریا دیموكرات كریه كو د ئه‌نجام دا حه‌فت شه‌رڤانان جانێ خوه ژ ده‌ست داینه.
ناڤه‌ندا چاڤدێریا مافێن مرۆڤی یا سووریێ راگه‌هاند كو داعش ل سووریێ و رۆژئاڤایێ كوردستانێ خوه بۆ كریارێن تیرۆرستی به‌رهه‌ڤ دكه‌ت و به‌ری چه‌ند رۆژان ژی ل دێرازۆرێ چه‌كدارێن رێكخستنا تیرۆرستی یا داعشێ ئێرشی هێزێن سووریا دیموكرات كرینه كو د ئه‌نجاما وێ ئێرشێ دا حه‌فت شه‌رڤانان جانێ خوه ژ ده‌ست داینه و گه‌له‌ك شه‌رڤانێن دی ژی بریندار بووینه و ئه‌و یه‌ك ژی نیشا دده‌ت كو پشتی ده‌مه‌كێ جاره‌كا دی داعش خوه بۆ كریارێن تیرۆرستی به‌رهه‌ڤ دكه‌ت.
ناڤه‌ندا چاڤدێریا مافێن مرۆڤی یا سووریێ ئه‌و یه‌ك ژی دیار كریه كو پشتی ئۆپه‌راسیۆنا هێزێن سووریا دیموكرات یا ل سه‌ر كه‌مپا هۆل رێكخستنا تیرۆرستی یا داعشێ ژی بریار دایه كو ده‌ست ب هنده‌ك كریارێن تیرۆرستی ل دژی هێزێن سووریا دیموكرات و له‌شكرێ سووریێ بكه‌ت، ژ به‌ر هندێ ژی دهێته چاڤه‌رێكرن كو كریارێن تیرۆرستی یێن داعشێ ل سووریێ و باكورێ سووریێ زێده‌تر لێ بهێن و ژ به‌ر هندێ ژی فه‌رماندارێ ئه‌مریكی به‌ری چه‌ند رۆژان سه‌ره‌دانا رۆژئاڤایێ كوردستانێ كریه و ل گه‌ل فه‌رماندارێ گشتی یێ هێزێن سووریا دیموكرات كۆمبوویه، د كۆمبوونێ دا فه‌رماندارێ ئه‌مریكی دیار كریه كو دڤێت ل هه‌مبه‌ر ئێرشێن داعشێ به‌رهه‌ڤیێن ته‌مام بهێنه كرن و دڤێت رێگری ل كریارێن داعشێ بهێته كرن و ل هه‌مبه‌ر دا فه‌رماندارێ گشتی یێ هێزێن سووریا دیموكرات ژی داخواز ژ ئه‌مریكا كریه كو پتر هاریكاریا وان بكه‌ن دا ئه‌و بشێن ئێرشێن داعشێ ژناڤ ببه‌ن و هه‌روه‌سا خه‌لكێ سڤیل ژی بپارێزن.
ئه‌و یه‌ك د ده‌مه‌كێ دایه كو به‌ری نها چاڤدێرێن سیاسی دیار كربوون كو داعش ل ده‌ڤه‌رێن سنۆری یێن د ناڤبه‌را ئیراقێ و سووریا دا خوه بۆ كریارێن تیرۆرستی به‌رهه‌ڤ دكه‌ت و پتر ژ ده‌ه هزار چه‌كدارێن داعشێ ل وان ده‌ڤه‌ران بجه بووینه.
بسپۆرێن سه‌ربازی ژی دیار دكه‌ن كو دڤێت هه‌ڤپه‌یمانیا نێڤده‌وله‌تی یا شه‌رێ ل دژی داعشێ جاره‌كا دی ده‌ست ب چالاكیێن خوه ل دژی داعشێ بكه‌ت، چونكی هه‌ر سستیه‌ك د شه‌رێ ل دژی داعشێ دا بهێته كرن ئه‌و یه‌ك دێ بیته ئه‌گه‌ر كو جاره‌كا دی داعش ده‌ست ب كریارێن تیرۆرستی ل سووریێ، ئیراقێ و ئۆرۆپا بكه‌ت، ژ به‌ر هندێ ژی دڤێت رێگری ل داعشێ بهێته كرن و باشترین كارێ نها بهێته كرن ژی ئه‌وه كو هه‌ڤپه‌یمانیا نێڤده‌وله‌تی یا شه‌رێ ل دژی داعشێ جاره‌كا دی ده‌ست ب ئێرشێن ئه‌سمانی ل دژی داعشێ بكه‌ت.
