رێكخستنێن جیهانی كوشتنا ژینایێ شه‌رمزار دكه‌ن
ئه‌ڤرۆ:
ب سه‌دان رێكخستنێن جیهانی كوشتنا كچا كورد یا رۆژهه‌لاتێ كوردستانێ ب ده‌ستێ هێزێن ئێمناهیێ یێ ئیرانێ شه‌رمزار كرن و راگه‌هاندن كو دڤێت هێزێن ئیرانێ زۆرداریا ل هه‌مبه‌ر ژنان بده‌نه راگرتن، چونكی كه‌س نه‌شێت ب زۆرێ تشته‌كێ ل سه‌ر كه‌سه‌كێ دی فه‌رز بكه‌ت و دڤێت ئیران رێزێ ل مافێن مرۆڤی بگریت، چونكی د چه‌ند سالێن بۆری دا ب ده‌هان ژن ل ئیرانێ هاتینه كوشتن و ئه‌و یه‌ك ژی ب چو ره‌نگه‌كێ ناهێته قه‌بوول كرن.
ل ئالیێ دی رێكخستنا چاڤدێریا مافێن مرۆڤی ژی راگه‌هاند كو به‌لگه‌یێن ل به‌ر ده‌ستێ وان نیشا دده‌ت كو پشتی ژینا ئه‌مینی ل ته‌هرانێ هاتیه ده‌سته‌سه‌ر كرن ل زیندانێ ب ئاسنی ل سه‌رێ وێ داینه و ژ به‌ر هندێ ژی ساخله‌میا وێ تێك چوویه و ژ به‌ر گرانیا برینێن خوه ل نه‌خوه‌شخانێ جانێ خوه ژ ده‌ست دایه.
ل ئالیێ دی ئه‌ڤرۆ ل پڕانیا باژێرێن رۆژهه‌لاتێ كوردستانێ وه‌كو نه‌رازیبوون ل هه‌مبه‌ر كوشتنا ژینایێ وه‌لاتیێن كورد ده‌ست ب مانگرتنێ كرن و هژماره‌ك زێده جهێن كاری هاتنه داخستن.
