ئێكه‌تیا ئۆرۆپا: ل هه‌مبه‌ر گه‌فێن پۆتینی بێده‌نگ نابین
ب، سه‌رجان مه‌حمود:
چارلس میشه‌ل سه‌رۆكێ كۆنسه‌یا ئۆرۆپا پشتی كۆمبوونا سه‌ركردێن ئێكه‌تیا ئۆرۆپا ل چه‌كیا راگه‌هاند كو رۆسیا د شه‌رێ ل دژی ئۆكرانیایێ دا نه‌شیایه هه‌تا نها سه‌ركه‌فتی بیت و ژ به‌ر هندێ ژی نها دڤێت ب گه‌فێن بكارئینانا چه‌كێ ئه‌تۆمی هه‌موو ئۆرۆپا بترسینیت و گۆت: (گه‌فێن پۆتینی و رۆسیا جددینه لێ ئه‌م وه‌ك ئێكه‌تیا ئۆرۆپا گه‌فێن د وارێ بكارئینانا چه‌كێ كیمیاوی و ئه‌تۆمی دا ب دژواری شه‌رمزار دكه‌ین و دڤێت رۆسیا بزانیت كو نه ئۆرۆپا و نه ژی ناتۆ سه‌رێ خوه ل هه‌مبه‌ر گه‌فێن رۆسیا ناچه‌مینن و دڤێت رۆسیا سیاسه‌تا خوه یا ل هه‌مبه‌ر ئۆكرانیایێ و ئۆرۆپا بگوهۆڕیت).
ئۆرسۆلا ڤان دیر لاین سه‌رۆكا كۆمسیۆنا ئۆرۆپا ژی هه‌ر د ڤێ مژارێ دا راگه‌هاند كو گه‌فێن ڤیلاده‌میر پۆتینێ سه‌رۆكێ رۆسیا جددینه لێ ئۆرۆپا ل هه‌مبه‌ر رۆسیا بێ چاره نینه و گۆت: (وه‌سا دیاره رۆسیا د ڤان حه‌فت هه‌یڤێن بۆری دا نه‌شیایه پلانێن خوه ل ئۆكرانیایێ بجه بكه‌ت و به‌رخوه‌دانا ئۆكرانیایێ سه‌رۆكێ رۆسیا زێده تووره كریه و ژ به‌ر ڤێ چه‌ندێ گه‌فا بكارئینانا چه‌كێ كیمیاوی و ئه‌تۆمی دكه‌ت و ئه‌م ئاخڤتنێن پۆتینی شه‌رمزار دكه‌ین و د ڤێ قۆناغێ دا گه‌فا بكارئینانا چه‌كێ ئه‌تۆمی گه‌له‌ك مه‌ترسیداره و دڤێت سه‌رۆكێ رۆسیا ژی باش بزانیت كو ئه‌م وه‌كو ئۆرۆپا ل هه‌مبه‌ر گه‌فێن وێ بێده‌نگ نابین).
ل ئالیێ دی جۆ بایدن سه‌رۆكێ ئه‌مریكا ژی پشتی گه‌فێن پۆتینی داخۆیانیه‌ك به‌لاڤ كر و راگه‌هاند كو مه‌ترسیا نها ل سه‌ر جیهانێ ژ قه‌یرانا سالا 1962 زێده‌تر بوویه و گۆت: (له‌شكرێ رۆسیا د شه‌رێ ل ئۆكرانیایێ دا شكه‌ستیه و درێژبوونا شه‌ری بوویه ئه‌گه‌رێ هندێ كو بارێ ده‌روونی یێ پۆتینی تێك چوویه و بۆ ڤێ چه‌ندێ ڤان گه‌فێن مه‌ترسیدار دكه‌ت.
