پێنج زانایێن ئیرانی ب توندی هۆشداریێ دده‌نه حوكمه‌تێ
ئه‌ڤرۆ:
پێنج زانایێن ئیرانی د داخۆیانیه‌كا هه‌ڤپشك دا راگه‌هاندن كو ره‌وشا ئیرانێ گه‌له‌ك خرابه و مخابن حوكمه‌تا نها ژی گۆهداریا داخوازیێن خه‌لكی ناكه‌ت هه‌كه خوه‌نیشادان و ئالۆزیێن نها ل ئیرانێ بۆ ده‌مه‌كێ به‌رده‌وام بن دێ ئابوورێ ئیرانێ ژناڤ چیت و ژ به‌ر هندێ ژی دڤێت حوكمه‌ت گۆهداریا داخوازیێن خه‌لكی بكه‌ت.
پێنج زانایێن ناڤدارێن ئیرانی د داخۆیانیه‌كا هه‌ڤپشك دا دیار كرن كو ره‌وشا ناڤخوه‌یی یا ئیرانێ گه‌له‌ك خرابه، ژ به‌ر سزایێن ئابووری یێن كو ئه‌مریكا ل سه‌ر ئیرانێ سه‌پاندینه بارێ ئابووری یێ ئیرانێ گه‌له‌ك خرابه و رێژه‌یا بێكاری و هه‌ژاریێ ژی گه‌له‌ك زێده‌یه، نها زێده‌تر ل نیڤا جڤاكێ ئیرانێ هه‌ژارن و ژ به‌ر هندێ ژی خوه‌نیشادانان ده‌ستپێكرینه، هه‌كه حوكمه‌تا ئیبراهیم ره‌ئیسی وه‌كو نها سه‌ره‌ده‌ریێ ل گه‌ل داخوازیێن خه‌لكی بكه‌ت دێ ره‌وش گه‌له‌ك خرابتر لێ هێت، چونكی حوكمه‌تێ نه‌ڤێت راستیا هه‌ی قه‌بوول بكه‌ت و هه‌رده‌م ب دره‌وان دخوازن راستیان ڤه‌شێرن، دڤێت حوكمه‌ت قه‌بوول بكه‌ت كو ل ئیرانێ قه‌یرانه‌كا گه‌له‌ك مه‌زن یا ئابووری هه‌یه، خه‌لك نه‌شێن پێدڤیاتێن سه‌ره‌كی یێن ژیانێ بۆ خوه دابین بكه‌ن، وه‌لاتی ژ ره‌وشا نها بێزارن و ژ به‌ر هندێ ژی رۆژ ب رۆژێ جوداهیا د ناڤبه‌را گه‌ل و ده‌ستهه‌لاتێ دا زێده‌تر دبیت.
مه‌سعود نیلی، محه‌مه‌د مه‌هدی، حه‌سه‌ن ده‌رگاهی، محه‌مه‌د ته‌بیبیان و موسا غه‌نی نه‌ژاد هه‌ر پێنج زانایێن ناڤدارێن ئیرانێ ئه‌و یه‌ك ژی دیار كرینه كو هه‌لوه‌ستێ چه‌ند رۆژێن بۆری یێن به‌رپرسێن ئیرانێ ل هه‌مبه‌ر داخوازیێن ره‌وا یێن خه‌لكی گه‌له‌ك شاش بوو، چونكی خه‌لك داخوازا ژیانه‌كا باش دكه‌ن و ئه‌و یه‌ك ژی مافێ وان یێ ره‌وایه، نابیت به‌رسڤا خه‌لكی گولله بن، دڤێت حوكمه‌ت گۆهداریا خه‌لكێ نه‌رازی بكه‌ت لێ مخابن یا نها روو دده‌ت گه‌له‌ك مه‌ترسیداره، چونكی ب توندوتیژیێ چو پرسه‌ك ناهێته چاره‌سه‌ركرن و هه‌لوه‌ستێ توند یێ به‌رپرسێن حوكمه‌تێ وه‌سا كریه كو قه‌یرانا هه‌ی دژوارتر لێ بهێت، ئێدی خه‌لك گۆهداریا درووشمان ناكه‌ن و وان داخوازیێن خوه هه‌نه، گه‌نجێن نها ژ به‌ر بێكاریێ و نه‌بوونا دادپه‌روه‌ریێ ده‌ست ب خوه‌نیشادانان كرینه و ده‌مێ هێزێن ئێمناهیێ ژی ته‌قه ل وان دكه‌ن ئه‌و ژی ئێدی پتر ژ ده‌ستهه‌لاتێ دوور دكه‌ڤن و نها كینه‌ك گه‌له‌ك مه‌زن ل هه‌مبه‌ر ده‌ستهه‌لاتێ دروست بوویه و ئه‌و یه‌ك ژی گه‌له‌ك مه‌ترسیداره و هه‌كه به‌رپرسێن نها یا پێدڤی نه‌كه‌ت ئه‌و یه‌ك دێ بیته ئه‌گه‌رێ ژناڤچوونا ده‌ستهه‌لاتا نها.
هه‌ر پێنج زانایێن ئیرانی ئه‌و یه‌ك ژی دیار كرینه كو ره‌وشا نها نیشا دده‌ت كو حوكمه‌تێ چو پرۆژه بۆ چاره‌سه‌ركرنا قه‌یرانا نها یا ئابووری ل ئیرانێ نینن، ب جهێ كو به‌رسڤا به‌رپرسان ئه‌رێنی بیت هنده‌ك ژ به‌رپرسێن ئیرانێ ب هه‌لوه‌ستێن خوه یێن سه‌یر سڤكاتیێ ب خوه‌نیشاده‌ران دكه‌ن، بێگومان ئه‌و یه‌ك ژی دبیته ئه‌گه‌ر كو خوه‌نیشاده‌ر ل سه‌ر هه‌لوه‌ستێ خوه به‌رده‌وام بن، چونكی ده‌وله‌ت چو هێڤیه‌كێ ناده‌ته وان و ئه‌و یه‌ك ژی دێ ئه‌نجامێن خوه یێن مه‌ترسیدار بۆ ده‌ستهه‌لاتێ هه‌بیت.
ل ئالیێ دی خوه‌نیشادانێن ل ئیرانێ و رۆژهه‌لاتێ كوردستانێ به‌رده‌وام دكه‌ن و دوهی ل پڕانیا باژێرێن رۆژهه‌لاتێ كوردستانێ و هنده‌ك ل باژێرێن ئیرانێ مانگرتنا گشتی برێڤه چوو و ل گه‌له‌ك ده‌ڤه‌ران ژی ئالۆزی دروست بوون و گه‌له‌ك كه‌س هاتنه ده‌سته‌سه‌ر كرن، هه‌روه‌سا ئێكه‌تیا مامۆستایان ل رۆژهه‌لاتێ كوردستانێ ژی هۆشداری دا حوكمه‌تێ هه‌كه توندوتیژیێ ل هه‌مبه‌ر قۆتابیان بكار بینن ئه‌و دێ پێكڤه ده‌ست ب مانگرتنه‌كا گشتی كه‌ن و داخواز ژ به‌رپرسێن ئیرانێ هاته كرن كو گۆهداریا داخوازیێن خوه‌نیشاده‌ران بكه‌ن.
د ئاستێ نێڤده‌وله‌تی دا ژی هه‌لوه‌ستێ هنده‌ك وه‌لاتان ل دژی ئیرانێ توندتر لێ هاتیه و به‌ری دو رۆژان حوكمه‌تا كه‌نه‌دا ١٠ هزار به‌رپرسێن سه‌ربازی یێن ئیرانێ سزا دا و هه‌روه‌سا بریار دا كو هه‌موو دارایێن به‌رپرسێن سه‌ربازی یێن ل كه‌نه‌دا ژی بهێنه بلۆكه كرن و رێ ب وان ده‌ه هزار كه‌سان ناهێته دان سه‌ره‌دانا كه‌نه‌دا بكه‌ن.
ل ئالیێ دی هه‌ر یه‌ك ژ وه‌لاتێن فره‌نسا، هۆله‌ندا، نه‌رویج، نه‌مسا و ئه‌لمانیا ژی داخواز ژ وه‌لاتیێن خوه كرن كو ب چو ره‌نگه‌كێ سه‌ره‌دانا ئیرانێ نه‌كه‌ن و هه‌روه‌سا داخواز ژ وه‌لاتیێن خوه یێن نها ل ئیرانێ ژی كرن كو د زووترین ده‌م دا ژ ئیرانێ ده‌ركه‌ڤن، چونكی ره‌وشا ئیرانێ گه‌له‌ك خرابه و ره‌نگه ب به‌هانێن جودا جودا ئیران وان ده‌سته‌سه‌ر بكه‌ت.
چاڤدێرێن سیاسی ژی دیار دكه‌ن كو یا نها ل ئیرانێ روو دده‌ت شوره‌شه كو ژن سه‌ركێشیا وێ دكه‌ت، ره‌وش رۆژ ب رۆژێ خرابتر لێ دهێت، چونكی ژن و لاوێن ئیرانی ژ ده‌ستهه‌لاتێ گه‌له‌ك تووره نه و داخوازا نه‌مانا ده‌ستهه‌لاتا نها دكه‌ن، ل هه‌مبه‌ر دا هێزێن ئێمناهیێ ژی ب توندی به‌رسڤا خوه‌نیشاده‌ران دكه‌ن و هه‌تا نها پتر ژ دوسه‌د كه‌سان هاتینه كوشتن و هێلێن ئینتێرنێتێ ژی ل ئیرانێ هاتینه بڕین دا كه‌س نه‌زانیت كا ل وی وه‌لاتی چ روو دده‌ت.
