رۆژا جیهانیا ساخله‌میا ده‌روونی ل دهۆكێ ب چه‌ندین چالاكیان هاته ساخكرن
دهۆك، له‌زگین جوقی:
ب ئاماده‌بوونا د. سامان به‌رزه‌نجی، وه‌زیرێ ساخله‌مێ ل حكومه‌تا هه‌رێما كوردستانێ و ماجد سه‌ید سالح، نوونه‌رێ پارێزگارێ دهۆكێ و فه‌هیم عه‌بدوللا، سه‌رۆكێ جڤاتا پارێزگه‌ها دهۆكێ و ده‌ڤه‌ردارێ دهۆكێ و سه‌رۆكێ زانكۆیا ئه‌مریكی هه‌ژماره‌كا زۆر یا مێهڤانان رۆژا جیهانیا ساخله‌میا ده‌روونی هاته ساخكرن.
د. ئه‌فراسیاب موسا، رێڤه‌به‌رێ گشتی یێ ساخله‌میا پارێزگه‌ها دهۆكێ دیار كر، ل پارێزگه‌ها دهۆكێ هه‌تا 54 بنگه‌هێن ساخله‌میێ ل گه‌ل سه‌نته‌رێ چاره‌سه‌ریا ده‌روونی هاتینه ڤه‌كرن و هه‌موو جۆرێن خزمه‌تێن ساخله‌می پێشكێشی نه‌خۆشان دكه‌ن و به‌رده‌وام ساخله‌میا دهۆكێ كار دكه‌ت، كو پتر خزمه‌تێن ساخله‌میێ پێشكێشی نه‌خۆشان بكه‌ت و گۆت: “نوكه ل دهۆكێ پشكه‌كا ده‌روونی د ناڤ نه‌خۆشخانا ئازادی دا هاتیه ڤه‌كرن و رۆژانه نه‌خۆشان چاره‌سه‌ر دكه‌ت، هه‌روه‌سا ژی سه‌نته‌ره‌ك بۆ چاره‌سه‌ریا كچ و ژنێن ئێزدی یێن ژ بن ده‌ستێن تیرۆرستێن داعشێ رزگار بووین هاتیه ڤه‌كرن و به‌رده‌وام چاره‌سه‌ریا رزگاربوویان دكه‌ت”.
د. ئه‌فراسیاب گۆتژی: “ئوفیسا ده‌روونی د ناڤ ساخله‌میا دهۆكێ دا پلانه‌كا پێنج سالی دانایه ب پشته‌ڤانیا رێكخراوان كار ل سه‌ر بجهئینانا پلانێ دێ هێته كرن، بۆ به‌رهه‌نگاریا خوه‌كوشتنێ، جڤاك پتر ل سه‌ر مه‌ترسیا خوه‌كوشتنێ و ماده‌یێن هۆشبه‌ر دێ هێته هشیاركرن، ل چه‌ند سالێن بۆری دا نه‌خۆشیا كۆرۆنایێ گه‌له‌ك كارتێكرن ل سه‌ر جڤاكی كریه و بوویه ئه‌گه‌ر خه‌لك تووشی نه‌خۆشیێن ده‌روونی ببیت، ئه‌ڤه بووینه ئه‌گه‌ر نه‌خۆشیێن ده‌روونی گه‌له‌ك په‌یدا ببن”.
رێڤه‌به‌رێ گشتی یێ ساخله‌میا پارێزگه‌ها دهۆكێ ئاشكرا ژی كر، ساخله‌میا ده‌روونی ل دهۆكێ پێشه‌نگ بوویه د پێشكێشكرنا خزمه‌تێن ده‌روونی دا بۆ نه‌خۆشان، سه‌نته‌ره‌كێ تایبه‌تمه‌ند بۆ چاره‌سه‌ریا زارۆك و سنێلان ل دهۆكێ هاتیه دانان و ئه‌ڤه دهێته هژمارتن تاكه سه‌نته‌ر ل سه‌رانسه‌ری هه‌رێما كوردستان و ئیراقێ، هه‌روه‌سا ل دهۆكێ سه‌نته‌ره‌ك بۆ چاره‌سه‌ریا رزگاربوویێن ده‌ستێ تیرۆرستێن داعشێ هاتیه ڤه‌كرن و به‌رده‌وام خزمه‌تا رزگاربوویان دكه‌ت”.
