شێفه‌كێ كورد خوارن بۆ سه‌رۆكێ لیبا چێكربوو
دهۆك، شاكر ئه‌تروشی:
شیف (حه‌سه‌ن محه‌مه‌د حه‌سه‌ن) به‌رنیاس ب (بابێ فارسی) د دیداره‌كێ دا بۆ رۆژناما ئه‌ڤرۆ دیاركر كو ل سالا 1976 وه‌ك شێف وی ل فرۆكخانا به‌غدا یا نێڤده‌وله‌تی كاركریه و هه‌تا نوكه ل سه‌ر كارێ خوه یێ به‌رده‌وامه و د ماوێ (46) سالێن كاركرنێ دا پرانیا به‌ربرس و پایه‌بلندێن ئیراقی و سه‌رۆكێن چه‌ند وه‌لاتێن عه‌ره‌بی، ژوانا (موعه‌مه‌ر قه‌زافی) سه‌رۆكێ به‌رێ یێ لیبیا خوارنێن وی خوارینه.
بابێ فارسی، كو نوكه دژیێ حه‌فتێ سالیێ دا یه و پێشمه‌رگێ خانه‌نشینێ شۆڕه‌شا ئیلۆنێ یه، گۆت: ده‌مێ ئه‌م ل به‌غدا حكومه‌تا وی سه‌رده‌می به‌رهه‌ڤیێن خوه دكرن بۆ مێڤانداریا (موتمر قمه بغداد) له‌ورا ئه‌م برینه خوله‌كا فێركرنا خوارنان ل په‌یمانگه‌ها به‌غدا یا گه‌شتیاری و بۆ ده‌مێ ساله‌ك و دو هه‌یڤان ئه‌و خول یا به‌رده‌وام بوو، چه‌ند ماموستایێن فره‌نسی وانه د دانه‌مه وپشتی ده‌رچوونێ مه باوه‌رنامه وه‌رگرتن و پشتی چه‌ند سالێن كاركرنێ ل به‌غدا ئه‌ز هاتمه باژێرێ مووسل و من خارنگه‌هه‌ك ڤه‌كر و پشتی تێكچوونا ره‌وشا وی باژێری چنكو ئه‌م كورد بووین خوارنگه‌ها مه ژلایێ تیرۆسستان ڤه هاته په‌قاندن، دووڤدا ئه‌ز هاتمه دهۆكێ و من خوارنگه‌ها بابێ فارسی ڤه‌كر و نوكه سێ كوڕێن من (رزگار، لوقمان، له‌زگین) كارێ من دكه‌ن و ئه‌ز بتنێ سه‌رپه‌رشتیا خوارنگه‌هێ دكه‌م، بۆ زانین ژی ئه‌ز كه‌سێ ئێكێ بوو كو ژلایێ وه‌زیرێ ساخله‌میا ئیراقێ ڤه هاتیمه خه‌لاتكرن و نوكه ئه‌ز پتر ژ دوسه‌د جۆرێن خوارنان و پتر ژ پێنجی جۆرێن سۆبێن رۆژهه‌لاتی دزانم چێكه‌م، لێ خه‌لكێ ئیراقێ بگشتی و یێ كوردستانێ ب تایبه‌تی گه‌له‌ك حه‌ز ژ ئافك و برنجێ دكه‌ین.
