ژ ترسا خوه‌نیشادانان ئیران ده‌ست ب گوهۆڕینان دكه‌ت
ئه‌ڤرۆ:
سه‌رۆكێ دادگه‌ها بلند یا ئیرانێ راگه‌هاند كو پۆلیسێن ره‌وشتی ئێدی ل ئیرانێ نه‌ماینه و ده‌زگه‌هێن راگه‌هاندنا ئیرانێ ژی دیار دكه‌ن كو نها پرۆژه‌یه‌ك دهێته به‌رهه‌ڤكرن دا كو بابه‌تێ ده‌رسوكێ ژی ل ئیرانێ نه‌بیته نه‌چاری و چاڤدێرێن سیاسی ژی دیار دكه‌ن ژ ترسا خوه‌نیشادانان ده‌ستهه‌لاتا ئیرانێ گوهۆڕینان دكه‌ت.
محه‌مه‌د جه‌عفه‌ر مونته‌زری سه‌رۆكێ دادگه‌ها بلند یا ئیرانێ راگه‌هاند كو پۆلیسێن ره‌وشتی ئێدی نه‌ماینه و ئه‌و بابه‌ت هاتیه داخستن و ئێدی چو كه‌سه‌ك وه‌كو پۆلیسێن ره‌وشتی ل ئیرانێ كار ناكه‌ت و راگه‌هاند كو هنده‌ك بابه‌تێن دی ژی هه‌نه كو به‌حسێ وان دهێته كرن كو دڤێت گوهۆرین تێدا بهێنه كرن، لێ ئه‌و یه‌ك ژی گرێدای ئالیێن په‌یوه‌ندیداره و دڤێت د ده‌مێن خوه دا بۆ رایا گشتی ئاشكرا بكه‌ن.
ل ئالیێ دی چه‌ندین رۆژنامێن ئیرانێ ژی راگه‌هاندن كو نها پرۆژه‌یه‌ك سه‌باره‌ت ب ده‌رسوكێ (حیجابا ئیجباری) ل ئیرانێ دهێته به‌رهه‌ڤكرن و ل گۆر وی پرۆژه‌ی دێ گوهۆرین د بابه‌تێ حیجابێ دا هێته كرن و ئێدی وه‌كو جاران ل سه‌ر ژنان و كچان ناهێته فه‌رزكرن.
چاڤدێرێن سیاسی ژی دیار دكه‌ن كو ژ به‌ر خوه‌نیشادانێن سێ مه‌هێن بۆری ده‌ستهه‌لاتا ئیرانێ گه‌له‌ك ته‌نگاڤ بوویه، هه‌روه‌سا كه‌سایه‌تیێن ناڤدار و ب ده‌هان رێكخستنێن ئیرانی خوه بۆ خوه‌نیشادانێن مه‌زن به‌رهه‌ڤ دكه‌ن و دهێته چاڤه‌رێكرن كو دووماهیا ڤێ حه‌فتیێ ل پڕانیا باژێرێن ئیرانێ ده‌ست ب خوه‌نیشادانان بهێته كرن، ژ به‌ر هندێ ژی ده‌ستهه‌لاتا نها یا ئیرانێ ژ ترسا خوه‌نیشادانان دڤێت ده‌ست ب هنده‌ك گوهۆڕینان بكه‌ت دا كو خه‌لك ده‌ست ژ خوه‌نیشادانان به‌رده‌ن، لێ ئه‌و گوهۆڕینێن ئیرانێ دڤێت بكه‌ت قه‌یرانا وی وه‌لاتی چاره‌سه‌ر ناكه‌ن، چونكی داخوازیێن وه‌لاتیان تنێ ئه‌و نینن، ئیران د قه‌یرانه‌كا گه‌له‌ك مه‌زن دایه و ره‌وشا ئابووری یا خه‌لكی ژی گه‌له‌ك خرابه.
ل گۆر باوه‌ریا چاڤدێرێن سیاسی خوه‌نیشادان نها بۆ نه‌مانا كۆمارا ئیسلامی یا ئیرانێ نه، هه‌كه سیسته‌مێ نها گوهۆڕینین بنگه‌هین نه‌كه‌ت نه‌شێت رێگریێ ل خوه‌نیشادانان بكه‌ت، چونكی یا نها ل ئیرانێ روو دده‌ت شورشه و رۆژ ب رۆژێ ژی پتر د ناڤ خه‌لكی دا به‌لاڤ دبیت و به‌رپرسێن ئیرانێ ژی باش دزانن كو نه‌شێن ڤێجارێ خوه‌نیشادانان سه‌ركوت بكه‌ن.
ئه‌و یه‌ك د ده‌مه‌كێ دایه كو ل گۆر ئامارێن رێكخستنا مافێن مرۆڤی هه‌تا نها نێزیكی ٥٠٠ كه‌س ل ئیرانێ ژ به‌ر خوه‌نیشادانێن ڤێ دووماهیێ هاتینه كوشتن، بیست هزار كه‌س ژی هاتینه ده‌سته‌سه‌ركرن و هه‌روه‌سا ده‌ستهه‌لاتا نها یا ئیرانێ ب هه‌موو ره‌نگه‌كێ دڤێت خه‌لكی بترسینیت دا خوه‌نیشادانان ب دووماهی بینیت لێ هه‌تا نها ده‌ستهه‌لاتێ نه‌شیایه بگه‌هیته ئارمانجا خوه، چونكی ل ئالیه‌كێ ره‌وشا ناڤخوه‌یی رۆژ ب رۆژێ خرابتر لێ دهێت و ل ئالیێ دی ژی ژ به‌ر قه‌یرانا ئابووری باوه‌ریا خه‌لكی ب گوهۆڕینان نه‌مایه و خه‌لك داخوازا نه‌مانا كۆمارا ئیسلامی یا ئیرانێ دكه‌ن.
