گولبین بۆزان: ژنا كورد نه‌شیایه جهێ خوه دناڤ سینه‌مایێ دا بكه‌ت
دهۆك، زنار تۆڤی:
گولبین بۆزان، ئه‌كته‌ره‌كا باكورێ كوردستانێ یه، ل دۆر گه‌را نه‌هێ یا فلمه فیسته‌ڤالا دهۆك یا نێڤده‌وله‌تی د د دیداره‌كێ دا بۆ رۆژناما ئه‌ڤرۆ دیاركر وێ وه‌كو ئه‌كته‌ر پشكداری د فلمێ سینه‌مایی (پیرهه‌ڤۆك) دا كریه و رۆلێ سه‌ره‌كی گێڕایه و هه‌تا نوكه وه‌ك ئه‌كته‌ر پشكداری د ده‌ه فلمێن سینه‌مایی یێن كوردی دا كریه.
ناڤهاتیێ گۆت: هه‌رده‌م ژن خه‌باتێ دكه‌ت ل هه‌مبه‌ری ژیانێ و زه‌لامان، دیسان سیسته‌م ژی ب هزرێن زه‌لامان هاتیه ئاڤاكرن، به‌لێ هه‌تا نوكه ژنا كورد وه‌كو پێدڤی نه‌شیایه جهێ خوه دناڤ سینه‌مایێ دا بكه‌ت، هه‌روه‌سا ده‌رهێنه‌ر و سیناریستێن كورد ژی، ده‌مێ دنڤیسن ژی ب پێنڤیسێ ب هزر و رامانێن زه‌لامان دنڤیسن، له‌وما دڤێت ئێدی دڤی واری دا كه‌دا ژنان ژی هه‌بیت، ئه‌ڤ چه‌نده دێ یا خۆشتر و گه‌شتر بیت ژ بۆ ژنان ژی، هه‌روه‌سا فلمه فیسته‌ڤالا دهۆكێ گه‌له‌ك گرنگیا خۆ بۆ من هه‌یه، چنكو ل هه‌ر چار ئالیێن جیهانێ سینه‌ماكار و هونه‌رمه‌ندێن كورد پشكداریێ تێدا دكه‌ن، و هیڤیا من ئه‌وه ل پارچێن دی ژی فلمه فیسته‌ڤالێن مینا یا دهۆكێ لێ بهێنه كرن.
