دالیا سابر: ده‌م یێ هاتی ئافره‌ت ببنه به‌رپرسێن كه‌نالێن راگه‌هاندنێ
دهۆك، شاكر ئه‌تروشی:
مه‌دیاكار (دالیا سابر) د دیداره‌كێ دا بۆ رۆژناما ئه‌ڤرۆ گۆت: ئه‌م هه‌موو دزانین كو ل پرانیا كه‌نالێن مه یێن راگه‌هاندنێ ب رێژه‌كا به‌رچاڤ ئافره‌ت لێ كاردكه‌ن و هه‌كه ئه‌ز بێژم ل هنده‌ك كه‌نالان پتریا كاری ل سه‌ر ملێن وانه ژی ئه‌ڤه راستیه‌كه و نابیت بهێته ڤه‌شارتن، لێ وه‌كو ئه‌ز دبینم هه‌تا نوكه مافێن وان دهێته خواران، چنكو هنده‌ك ئافره‌ت ل وان كه‌نالان كاردكه‌ن ئه‌و ژی دشێن وه‌كو زه‌لامان ببه رێڤه‌به‌رێن ته‌له‌فزیۆنان یان رادیۆیان، یان هه‌تا رۆژنامه و گۆڤاران ژی، لێ بۆچی هه‌تا نوكه ئه‌و ده‌لیڤه ب وان نه‌هاتیه دان به‌رسڤ بلا بۆ وان كه‌سان بیت یێن سه‌رپه‌رشتی و ئیداره‌كرنا وان كه‌نالان دكه‌ن و هه‌كه وان دادپه‌روه‌ری دڤێت پێدڤیه پێداچوونه‌كێ دهزرێن خوه دا بكه‌ن و ژنوكه وێڤه پتر ئافره‌تان دانه وان جهان.
زێده‌تر گۆت: راسته نوكه ل هنده‌ك كه‌نالان به‌رپرسا ئێكێ ئافره‌ته، لێ ئه‌ڤه گه‌له‌ك دكێمن و ره‌نگه هژمارا وان ژ ده‌ه كه‌سان نه‌بۆریت، و ئه‌ز ب پشت راستیڤه دبێژم نوكه مه هنده‌ك مه‌دیاكارێن ئافره‌ت هه‌نه هه‌كه بكه‌نه رێڤه‌به‌ر یان سه‌رتڤیسه‌ر دێ باشتر ژ زه‌لامان وی كه‌نالی ب رێڤه‌به‌ت.
دالیا سابر محه‌مه‌د ئه‌مین ، ژدایكبوویا سالا (1998) یه، پتری شه‌ش سالانه د بۆارێ راگه‌هاندنێ دا كاردكه‌ن، نوكه بێژه‌ر و پێشكێشكاره ل رادیۆیا هێلین كو سه‌ر ب سكرتاریه‌تا ئێكه‌تیا ئافره‌تێن كوردستانێ ڤه یه ل هه‌ولێرێ، هه‌روه‌سا كارێ مۆنتێری و ده‌رهێنه‌ریێ ژی ل وێ رادیۆیێ دكه‌ت.
