35 سالن چاڤه‌ڕێی جه‌نازێن هه‌ڤژین و سێ كوڕێن خوه یه
ئه‌ڤرۆ، شاكر ئه‌تروشی:
ئامینا زێوه‌یی، هه‌ڤژینا شه‌هید (محه‌مه‌د زێوه‌یی) و دایكا هه‌رچار شه‌هیدان (عه‌لی، سه‌دیق، موسا، عومه‌ر) وخوشكا شه‌هید عه‌باس، د دیداره‌كێ دا بۆ رۆژناما ئه‌ڤرۆ گۆت: به‌ری سیه و پێنج سالان هه‌ڤژین و سێ كوڕێن من ل پێش چاڤێن من ل كه‌لها نزاركێ ژلایێ ره‌شه‌كێن رژێمێ ڤه ب توندی هاتنه ئه‌شكه‌نجه‌دان پاشان به‌ر ب چاره‌نڤیسه‌كێ نه‌دیارڤه برن، لێ هه‌تا نوكه ئه‌ز یا چاڤه‌ڕێی وانم و هه‌تا دمرم چركه‌كا بتنێ ژی وان ژبیرناكه‌م.
ئامینا ته‌مه‌ر عه‌باس، گۆت: ده‌مێ ئه‌ز یا بچووك مالامه ل گوندێ (زێوا شێخ پیرامیس) بوو، ل وی ده‌می بیرا من دهێت گه‌له‌ك جاران بارزانیێ نه‌مر دهاته گوندێ مه و نوكه ژی شكه‌فته‌ك ل گوندی هه‌یه دبێژنێ (شكه‌فتا مه‌لا مسته‌فای) و من بخوه بارزانی چه‌ند جاران یێ دیتی و ئه‌ز یا دگه‌ل ئاخفتیم، هه‌ر ل گوندێ مه باره‌گایێ شه‌هیدێ سه‌ركرده (ئه‌سعه‌د خۆشه‌ڤی) لێ هه‌بوو گه‌له‌ك پێشمه‌رگه ل وێرێ بوون، ژوانا (بابه‌كر زێباری، فارس كۆره‌ماركی، مه‌هدی نزاركی) رۆژانه مه خوارن ل مالا خوه بۆ دلێنا و دبر، لێ پشتی سالا 1975 ژ نه‌چاری مه گوندێ خوه به‌ردا و چوینه گوندێ (ئه‌رزێ) دووڤدا چوینه ده‌ڤه‌را گولیا ل گوندێ چه‌لكێ و نه‌رمكێ، پاشان جاره‌كا دی زڤڕینه گوندێ خوه و مه به‌رده‌وامی ب خزمه‌تكرنا شۆڕه‌شێ دا و ب ده‌سته‌كی من لاندك د هه‌ژاند و ب ده‌سته‌كی نان بۆ پێشمه‌رگه‌ی دپات و ل سه‌ر ده‌مێ شۆڕه‌شێ مه شه‌ش خانی ئاڤاكرن و هه‌موو ژلایێ رژێمێ ڤه هاتینه خراپكرن، هه‌تا سالا 1988 ئه‌نفالێن ره‌ش ب سه‌رمه‌دا هاتن و ئه‌م ئیناینه كه‌لها نزاركێ، ل وێرێ هه‌ڤژین و سێ كوڕێن من و تیێ من و كوڕێن وی برن و بێ سه‌روشوینكرن، ئانكو 14 كه‌س ژمالا من و 44 كه‌س ژ گوندێ من د ئه‌نفالاندا بێ سه‌روشین بینه، نوكه ژ 7 كوڕان بتنێ من 2 كوڕ ماینه و ژ سێ برا ژی بتنێ من برایه‌ك مایه.
