به‌رهه‌ڤی بۆ خوه‌نیشادانێن نوو ل ئیرانێ دهێنه كرن
ئه‌ڤرۆ:
به‌رپرسه‌كێ وه‌زاره‌تا ناڤخوه یا ئیرانێ بۆ ئاژانسا مێهر یا وی وه‌لاتی دیار كریه كو ئه‌مریكا و ئسرائیل دخوازن ب رێیا خوه‌نیشادانێن نوو ئالۆزیێن ل ئیرانێ دژوارتر لێ بكه‌ن و ده‌ستهه‌لاتێ ته‌نگاڤ بكه‌ن، ژ به‌ر هندێ ژی نها به‌رهه‌ڤی بۆ خوه‌نیشادانێن نوو ل ئیرانێ دهێنه كرن لێ دڤێت هێزێن ئێمناهیێ ڤێجارێ گه‌له‌ك د هشیار بن و دڤێت رێ نه‌هێته دان جاره‌كا دی ره‌وشا ناڤخوه‌یی یا ئیرانێ ئالۆزتر ببیت.
هه‌مان به‌رپرسی ئه‌و یه‌ك ژی دیار كریه كو وان هه‌تا نها شیاینه گه‌له‌ك ژ خوه‌نیشاده‌ران و كه‌سێن كو خوه‌نیشادان رێكخستن دكرن ده‌سته‌سه‌ر بكه‌ن، لێ ئالۆزی هه‌تا نها ژی به‌رده‌وام دكه‌ن، چونكی ئه‌مریكا و ئسرائیل ل گه‌ل هنده‌ك وه‌لاتێن دی ناخوازن ره‌وشا ئیرانێ یا ئارام بیت و ب گه‌له‌ك رێیان كار دكه‌ن دا ئالۆزیان دروست بكه‌ن.
ل ئالیێ دی گه‌له‌ك ژ چالاكڤانێن ئیرانی یێن ل ئه‌مریكا و ئۆرۆپا ژی داخواز ژ خه‌لكێ ئیرانێ دكه‌ن كو خوه‌نیشادانان به‌رفره‌هتر لێ بكه‌ن، چونكی ده‌ستهه‌لاتا نها به‌رهه‌ڤ نینه چو گوهۆرینان بكه‌ت و ده‌ستهه‌لاتێ دڤێت ب سێداره‌دانا هنده‌ك ژ گرتیان خه‌لكی چاڤترسی بكه‌ت، ژ به‌ر هندێ ژی دڤێت خوه‌نیشادان به‌رفره‌هتر لێ بهێن و نابیت خه‌لك ل هه‌مبه‌ر زۆداریا ده‌ستهه‌لاتا نها بێده‌نگ بن.
چاڤدێرێن سیاسی ژی دیار دكه‌ن كو سالا ٢٠٢٣ دێ بۆ ئیرانێ ساله‌كا گه‌له‌ك نه‌خوه‌ش بیت، چونكی ره‌وشا ئابووری رۆژ ب رۆژێ خرابتر لێ دهێت و د هه‌مان ده‌می دا ده‌ستهه‌لاتا نها ژی به‌رهه‌ڤ نینه چو گوهۆرینان بكه‌ت، ژ به‌ر هندێ ژی دهێته چاڤه‌رێكرن كو خوه‌نیشادان و ئالۆزیێن هه‌ی دژوارتر لێ بهێن، چونكی ده‌ستهه‌لاتا نها خوه به‌رهه‌ڤ دكه‌ت دا خوه‌نیشاده‌ران سه‌ركوت بكه‌ت و خه‌لك ژی به‌رهه‌ڤ نینن ده‌ستان ژ داخوازیێن خوه به‌رده‌ن.
