شینوار كه‌مال: هونه‌رمه‌نده‌كێ كورد دێ كلیپه‌كێ ل دۆر خزمه‌تا (شێخ شامۆ)ی به‌لاڤ كه‌ت
ئه‌ڤرۆ، رێوار محه‌مه‌د ره‌شید:
شینوار كه‌مال، ده‌رهێنه‌ره‌كێ پارێزگه‌ها دهۆكێ یه بۆ به‌رپه‌رێ هونه‌ری یێ رۆژناما ئه‌ڤرۆ دیار كر: نوكه ئه‌و كارێ ده‌رهێنانێ بۆ كلیپه‌كا نوو یا هونه‌رمه‌ندێ كورد (رێكێش سه‌یرانی) دكه‌ت كو ژ په‌یڤێن هه‌لبه‌ستڤان (ره‌شو عه‌یشان)ی و ئاوازێن (عومه‌ر)ی نه، هونه‌رمه‌ندێ ناڤهاتی ب هه‌لكه‌فتا بوورینا ساله‌كێ ل سه‌ر بیره‌وه‌ریا وه‌غه‌ركرنا خودێ ژێ ڕازی (شێخ شامۆ) شیره‌تكارێ سه‌رۆكێ حكومه‌تا هه‌رێما كوردستانێ و په‌رله‌مانتارێ به‌رێ یێ په‌رله‌مانێ كوردستانێ و سه‌رۆكێ ده‌سته‌یا بلندا بنگه‌هێ لالش ڤێ سترانێ كلیپ دكه‌ت كو ئه‌ڤ كلیپه ده‌ربڕینێ ژ رۆلێ (شێخ شامۆ)ی د خزمه‌تا ته‌خ و چینێن جوداجودا دا و بابه‌تێ پێكڤه‌ژیانێ و هتد…. دكه‌ت و گۆت:”ل رۆژێن داهاتی ئه‌ڤ كلیپه دێ ب دووماهی هێت و ژڤانه ل رۆژا 17/1/2023 كو رۆژا به‌ری وه‌غه‌ركرنا خودێ ژێ ڕازی یه بهێته به‌لاڤكرن”.
ناڤهاتی ئاماژه دا وێ چه‌ندێ ئه‌ڤ ڤیدیۆ كلیپه ل په‌رستگه‌ها لالش و ده‌وروبه‌رێن خانكێ و به‌نداڤا مووسل و هنده‌ك جهێن دی یێن پارێزگه‌ها دهۆكێ دهێته وێنه‌كرن و چه‌ندین زه‌لامێن ئایینی ژی تێدا د پشكدارن و گۆت: “سیناریۆیه‌كا گه‌له‌ك باش بۆ ڤێ سترانێ ژ لایێ من و (مازن ئیسیانی) ڤه هاتیه ئاماده‌كرن، راسته ئه‌ڤ ڤیدیۆ كلیپه به‌رهه‌مێ كۆمپانیا پالۆ وار پروده‌كشنه، به‌لێ دێ ل هه‌می كه‌نالێن كوردی و سوشیال میدیایێ هێته به‌لاڤكرن”.
