راپۆرتا په‌یامنێره‌كێ ئه‌ڤرۆ خه‌لاتێ سێیێ یێ بنگه‌هێ لالش وه‌رگرت
ئه‌ڤرۆ:
ده‌سته‌یا بلندا بنگه‌هێ لالش یێ ره‌وشه‌نبیری و جڤاكی ل دهۆكێ، به‌ریكانه‌ك بۆ هژماره‌كا رۆژنامه‌ڤانێن هه‌رێما كوردستانێ رێكخست و راپۆرته‌كا په‌یامنێرێ ئه‌ڤرۆ خه‌لاتێ سێیێ دوێ به‌ریكانێ دا وه‌رگرت.
نه‌وزاد هلۆری، په‌یامنێرێ رۆژناما ئه‌ڤرۆ و سه‌ركه‌فتیێ سێیێ یێ وێ به‌ریكانێ گۆت: من ب راپۆرته‌كا نڤیسكی پشكداری دوێ به‌ریكانێ دا كر و بۆمه سه‌ركه‌فتیێ سێیێ، راپۆرتا من ل دۆر ره‌ڤاندنا كچه‌كا ئێزدی بوو، كو ل سالا 2014 ل ده‌مێ شه‌ڕێ داعش ژلایێ وه‌لاتیه‌كێ خه‌لكێ مووسل هاتبوو ره‌ڤاندن و ئه‌و كچ دگه‌ل گیانه‌وه‌ره‌كێ كویڤی هاتبوو زیندانكرن و گه‌له‌ك نه‌خۆشی و ئازار دیتینه، چیرۆكا وێ بوویه كورته فلمه‌كێ سینه‌مایی و ل به‌ره ل فیسته‌ڤالێن جیهانی بهێته نیشادان و پشكداریا من دوێ به‌ریكانێ دا پتر ژ بۆ هندێ بوویه كو هه‌موو پێكڤه كاربكه‌ین ژبۆ گه‌هاندنا ده‌نگێ زۆلم و سته‌ما خه‌لكێ شنگارێ.
