فیسته‌ڤالا فلمێن دكیۆمێنتاری دێ ب فلمه‌كێ سه‌هیم عومه‌ر ده‌ستپێكه‌ت
دهۆك، زنار تۆڤی:
فلمێ دكیۆمێنتاری یێ ده‌رهێنه‌رێ كورد (سه‌هیم عومه‌ر خه‌لیفه‌ی) كو ل سه‌ر ژیانا له‌تیف عانی فوتۆگرافه‌رێ ئیراقی یه، وه‌كو فلمێ ده‌ستپێكی ل فیسته‌ڤالا فلمێن دكیۆمێنتاری هاتیه هه‌لبژارتن و د پشكا فلمێن به‌لجیكی دا د هه‌ڤڕكیا ب ده‌ستڤه‌ئینانا خه‌لاتان دایه. سه‌هیم عومه‌ر بۆ رۆژناما ئه‌ڤرۆ دیاركر كو ئه‌و فلمێ دكیۆمێنتاری ب ناڤێ (جوانیا ڤه‌شارتی یا ئیراقێ) یه، تێدا به‌حسێ له‌تیف عانی و به‌رهه‌مێن وی دكه‌ت، كو وی گه‌له‌ك وێنێن باشۆرێ كوردستانێ گرتینه، ب تایبه‌تی یێن سه‌ركردێن كورد، ژ وانا بارزانیێ نه‌مر و سه‌رۆك مه‌سعود بارزانی و ئدریس بارزانی.
فیسته‌ڤالا فلمێن دكیۆمێنتاری دۆكفیلا ب گرنگترین فیسته‌ڤالا فلمێن دكیۆمێنتاری ل به‌لجیكا دهێته نیاسین و دێ ل باژێرێ لۆڤین ل ( 22-30) مه‌ها ئادارا 2023 ێ هێته گێران، ئه‌و فلمێ خه‌لاتێ لژنا دادوه‌ری ب ده‌ستڤه دئینیت، دێ چیته د لستا درێژ یا به‌ربژاركرنێ بۆ وه‌رگرتنا خه‌لاتێ ئۆسكارێ، ئه‌و فلمێ دكیۆمێنتاری ل سالا 2020 ل به‌غدا و چه‌ند ده‌ڤه‌رێن هه‌رێما كوردستانێ هاتیه وێنه‌كرن و پشتی ساله‌كێ ژ وێنه‌كرنێ، له‌تیف عانی وه‌غه‌ركریه و د وی به‌لگه فلمی دا، مه تیشك خستییه سه‌ر ژیانا له‌تیف عانی و قوناغێن گرنگ یێن ژیانا وی، هه‌روه‌سا مه به‌حسێ په‌یوه‌ندی یێن ل گه‌ل خه‌لكێ كوردستانێ و دیتنین وی بۆ كوردستانێ كرینه، لاس بێلگاس به‌رهه‌مهێنه‌رێ سه‌ره‌كی یێ وی فلمی یه.
