ئیران هه‌لوه‌ستێ خوه ل هه‌مبه‌ر رۆسیا دگوهۆڕیت
ئه‌ڤرۆ:
پشتی كو په‌رله‌مانێ ئۆرۆپا بریار دا سوپایێ پاسداران بكه‌ته د ناڤ لیستا رێكخستنێن تیرۆرستی دا ئیرانێ ژی ل هه‌مبه‌ر گڤاشتنێن ئۆرۆپا گوهۆرین د هه‌لوه‌ستێ خوه دا ل هه‌مبه‌ر رۆسیا كریه و ئه‌و یه‌ك ژی بوویه جهێ دلگرانیا رۆسیا.
حسێن ئه‌میر عه‌بدوللاهیان وه‌زیرێ ده‌رڤه یێ ئیرانێ راگه‌هاند كو ئه‌و وه‌كو ئیران قرم، دونتسك و لوهانسك وه‌كو پشكه‌ك ژ ئاخا رۆسیا نابینن و نابیت رۆسیا ب زۆرێ ئاخا ئۆكرانیایێ بكه‌ته پشكه‌ك ژ ئاخا خوه.
ئه‌و یه‌ك د ده‌مه‌كێ دایه كو وه‌لاتێن ئێكه‌تیا ئۆرۆپا و ئه‌مریكا به‌رده‌وام ئیرانێ ب هندێ تومه‌تبار دكه‌ن كو د شه‌رێ ل ئۆكرانیایێ دا ئیران هاریكاریا رۆسیا دكه‌ت و به‌رده‌وام درۆنان و موشه‌كان دده‌ته رۆسیا.
چاڤدێرێن سیاسی ژی دیار دكه‌ن كو هه‌لوه‌ستێ توند یێ ئۆرۆپا ل هه‌مبه‌ر ئیرانێ وه‌سا كریه كو به‌رپرسێن وی وه‌لاتی نه‌چار بن هنده‌كێ خوه ژ رۆسیا دوور بكه‌ن لێ ئه‌و یه‌ك نه‌شێت ئیرانێ قورتال بكه‌ت چونكی پشتی بریارا په‌رله‌مانێ ئۆرۆپا دهێته چاڤه‌رێكرن كو وه‌لاتێن ئێكه‌تیا ئۆرۆپا ب توندی ئیرانێ سزا بده‌ن.
