نووژه‌نكرنا گۆڕێن هونه‌رمه‌ندان ل زاخۆ دێ یا به‌رده‌وام بیت
زاخۆ، عه‌لی حاجی:
ل سه‌ر راسپارده‌یا (گوهدار شێخۆ) سه‌رپه‌رشتێ ئیداره‌یا سه‌ربه‌خۆیا زاخۆ، گۆڕێ هونه‌رمه‌ندێ نه‌مر (ئه‌یاز یوسف) ب رازیبوونا بنه‌مالا وی هاتیه نووژه‌نكرن و نووژه‌نكرنا وی گۆڕی ژی ب ده‌ستپێشخه‌ریا ده‌رهێنه‌ر(كامیران بێتاسی) بوو.
دلخاز موسا، رێڤه‌به‌رێ رێڤه‌به‌ریا ره‌وشه‌نبیری و هونه‌ری ل زاخۆ، د دیداره‌كێ دا بۆ رۆژناما ئه‌ڤرۆ دیاركر كو ل حه‌فتیا بۆری گۆڕێ ئه‌یازی ب شێوه‌كێ جوان هاتبوو دیزاینكرن و به‌ری چه‌ند ساله‌كان گۆڕه‌ك بۆ هونه‌رمه‌ندێ مه‌زن ئه‌رده‌وان زاخۆیی ژی هاتبوو چێكرن و گۆڕێ هونه‌رمه‌ند حه‌سه‌ن جزیری ژی ل زاخۆیه و ئه‌وا د شیاندا بیت دێ ئه‌نجام ده‌ین و بڕیاره بۆ سالا بهێت ژی گۆرێ هونه‌رمه‌ند عه‌بدولواحد زاخۆیی بهێته نووژه‌نكرن و ل حه‌فتیا بۆری مه سالڤه‌گه‌ڕا وانژی ساخكربوو، ئه‌م وه‌كو رێڤه‌به‌ریا ره‌وشه‌نبیری و هونه‌ری ل زاخۆ ئه‌م گرنگیه‌كا تایبه‌ت وان سێ هونه‌رمه‌ندێن وه‌غه‌ركری و هه‌می هونه‌رمه‌ندێن دی دده‌ین.
